Қырғызстанның экс-президентінің отбасы далада қалды

Қырғызстанның бұрынғы президенті Алмазбек Атамбаевтың отбасын үйінен күштеп шығарды. Бұл туралы әлеуметтік желілерде оның балалары Әлия Шагиева мен Қадырбек Атамбаев мәлімдеді, деп хабарлайды Orda.kz. 

Полиция қызметкерлері экс-президенттің отбасын Қой-Таш ауылындағы үйден шығарып тастаған. Сонымен қатар, полицейлер үйдегі бар затты алып, арнайы жабдықталған контейнерге салып әкеткен.

Әлия Шагиеваның айтуынша, экс-президенттің отбасын жаңбырлы күні көшеде қалдырыпты. Атамбаевтың балалары қазір туыстарының үйін паналаған. 

Айта кетейік, Қой-Таш ауылындағы бұрынғы президенттің үйі мемлекетке қайтарылды. Бұған дейін мемлекеттік мүлікті басқару жөніндегі агенттіктің директоры Тимур Малбашев мұнда 500 орындық заманауи қарттар үйі мен жаңа балабақша салуға ниетті екенін хабарлаған болатын.

Еске салайық, Бішкектегі Первомай аудандық соты Қырғызстанның бұрынғы президенті Алмазбек Атамбаевты бірнеше ауыр бап бойынша кінәлі деп танып, 11 жылға соттады.