Қырғыз жазушысы қазақ деген ұлт жоқ деп қоғам сынына ұшырады

Қырғыз жазушысының қазақ тарихына қатысты пікірі қоғамда сынға ұшырады. Әлеуметтік желілерде қырғыз жазушысы, аудармашы әрі полиглот Турусбек Мадылбайдың мәлімдемесі кеңінен талқыланып жатыр, деп хабарлайды Orda.kz.        

Ол сұхбаттарының бірінде қазақ халқының тарихы мен мемлекеттілігіне қатысты даулы пікір білдіріп, «қазақ деген ел болмаған» деген мазмұндағы көзқарасын айтқан.

Жазушы өз сөзінде ортағасырлық және көне жазба деректердегі этнонимдерді өзінше түсіндіруге тырысып, «қазақ» атауы дербес халық ретінде кейінірек қалыптасты деген тұжырым жасайды. Алайда сарапшылар оның бұл пікірі ғылыми негізделген зерттеулерге емес, баламалы тарихқа сүйенген жеке көзқарас екенін алға тартып отыр.

Даулы мәлімдеме қоғамда қызу пікірталас туғызды. Қазақстандық және қырғызстандық әлеуметтік желі қолданушылары жазушының сөздерін тарихи деректерді бұрмалау деп бағалап, мұндай пікірлер бауырлас халықтар арасындағы түсіністікке кері әсер етуі мүмкін екенін айтуда.

Кәсіби тарихшылар да бұл тұжырымдардың ғылыми дәлелі жоқ екенін атап өтті. Олардың айтуынша, Қазақ хандығының құрылуы – тарихи деректермен нақты дәлелденген факт. Атап айтқанда, Керей мен Жәнібек хандардың бастауымен 1465 жылы Қазақ хандығының құрылғаны тарих ғылымында кеңінен мойындалған. Бұл мәліметтер «Тарих-и Рашиди» еңбегінде де көрсетілген.

Сонымен қатар зерттеушілер қазақ мемлекеті мен оның аумағы туралы мәліметтер ортағасырлық еуропалық, қытай және орыс дереккөздерінде де кездесетінін айтады. Көптеген тарихи карталарда қазақ жері дербес саяси бірлік ретінде белгіленген.

Осылайша, сарапшылар Турусбек Мадылбайдың пікірін ғылыми қауымдастық мойындаған тұжырым емес, жеке көзқарас ретінде қарастыру қажет екенін айтып жатыр.

Оқи отырыңыз:

• Түркиядан Жәнібек хан туралы 1350 жылы жазылған қолжазба жеткізілді 
• Ұлттық орталық бірегей тарихи қолжазбаның көшірмесін ұсынды
• Тоқаев құттықтады: Қырғызстан БҰҰ Қауіпсіздік Кеңесіне қосылды