Қырғыз ауылындағы қыз зорлауға қатысты оқиғадан кейін тұрғындар өлім жазасын талап етті

Қырғызстанда 17 жастағы қызды зорлап, өлтіргеннен кейін тұрғындар қылмыскерлерді өлім жазасына кесуді талап етіп отыр, деп хабарлайды Orda.kz.

Барскоон ауылында жүздеген тұрғын жиналып, құқық қорғау органдары мен жергілікті билік өкілдерімен кездесу өткізді. Жиын барысында олар билікке балаларды зорлағандар үшін заңға өлім жазасын енгізу туралы талап қойды. Бұл талап кәмелетке толмаған қыздың зорлық-зомбылық құрбаны болып, қаза табуына байланысты өткен жерлеу рәсімінде көтерілді.

24 KG мәліметінше, жиналғандар қылмыскерлерді түрмеге жабу түбегейлі шешім емес екенін айтқан.

«Біз, Барскоон халқы президентке және ҰҚК төрағасына үндеу жолдаймыз: заңға өзгеріс енгізіп, өлім жазасын қайта енгізу қажет. Өйткені түрме мұндайларды түземейді», — дейді ауыл тұрғындары.

Айта кетейік, Қырғызстанда қыркүйек айында жантүршігерлік адам өлімі тіркелді. 27 қыркүйекте Ыстықкөл облысының Жетіқұз ауданындағы шатқалдан 17 жастағы қыздың денесі табылды. Бойжеткен Барскоон ауылындағы үйінен шығып, Победа ауылындағы досына кеткеннен қайта оралмаған.

Іздеу барысында ауылдағы бақылау камераларына түскен бейнеден қыздың «Honda Stream» көлігіне мінгені белгілі болды. Алайда, көлік жүргізушісі алдымен қызды зорлап, кейін өлтіріп, денесін Ыстықкөлдің жағасына көміп кеткен. Кейін қылмыскер қайта келіп, марқұмның денесін қазып алып, шатқалға лақтырған.