Күрес кезінде клиникалық өлімді бастан кешкен 15 жастағы бала жан тапсырды

Ерейментауда күрес кезінде клиникалық өлімді бастан кешкен 15 жастағы бала жан тапсырды, деп хабарлайды Orda.kz.

7 қыркүйек күні Ақмола облысында өткен күрес жарысында ауыр жарақат алған 2010 жылы туған бала санитарлық авиациямен Астанаға жеткізілді. Ол №2 көпсалалы қалалық балалар ауруханасына түскен.

Астана қалалық Қоғамдық денсаулық сақтау басқармасының хабарлауынша, бала ауруханаға түскен сәтте жағдайы өте ауыр болған. Сол себепті ол бірден жансақтау және қарқынды терапия бөліміне жатқызылған.

«Барлық қажетті шұғыл медициналық көмек көрсетілді. Емдеу шаралары республикалық деңгейдегі мамандардың қатысуымен жүргізілді. Бірнеше рет дәрігерлік консилиум өткізілді», деп мәлімдеді басқарма.

2025 жылдың 15 қыркүйегінде ол қайтыс болды.

Еске сала кетейік, күрес кезінде Ақтөбеден келген 15 жастағы балуан қарсыласын кілемге жыққанда мертігіп қалды. Жарыста кезекшілікте жүрген аурухана дәрігері дереу көмек көрсетті. Жасөспірім боз кілемнің үстінде клиникалық өлім күйін кешті.