Құлыбаевтың құлқында кеткен 1 млрд доллардың қайтуына қатысты Бас прокуратура нақты жауап қатпай отыр

Бас прокуратураның активтерді қайтару жөніндегі комитеті экс-президент Нұрсұлтан Назарбаевтың күйеу баласы Тимур Құлыбаевтың мемлекетке 1 млрд доллар төлеуіне қатысты келіссөздер туралы толық ақпарат бермейді, бірақ «заңсыз активтер» ұғымын қолданады, деп хабарлайды Orda.kz.

КазТАГ мәліметінше, нақты бір жауаптың болмауын Бас прокуратура заңдағы құпиялылық тармағына сілтеп отыр.

«Заңның 8-бабы 3-тармағына сай, активтерді қайтаруға жауапты орган мен комиссия мүшелері алынған мәліметтердің құпиялылығын сақтауға міндетті. Комиссия шешімі бойынша, атқарылып жатқан жұмыстарға қатысты егжей-тегжейлі ақпарат жарияланбайды», – деп мәлімдеді комитет.

Bloomberg бұған дейін Құлыбаевтың Қазақстан билігімен мемлекетке 1 млрд доллар төлеу мәселесі бойынша келіссөздер жүргізіп жатқанын жазған еді. Егер мәміле жасалса, одан ешқандай кінәні мойындауды талап етпейді және белгілі бір төлемдер мен инвестицияларды қамтиды.