Құлсарыда сыныптастарына балта ала жүгірген оқушы мектеп партасына оралды

Атырау облысында мектепте балта ұстап жүгірген оқушыға қатысты іс бойынша соттың алғашқы отырысы өтті. Оқушы үйқамаққа алынды, алайда оған сабаққа қатысуға рұқсат етілді, деп хабарлайды Orda.kz. 

Атырау облыстық білім беру басқармасының басшысы Марат Абуовтың айтуынша, соттың алғашқы отырысынан кейін жасөспірім үйқамаққа алынған. Сонымен қатар, оған мектепке және медициналық ұйымдарға баруға рұқсат берілген. Оқушыға тағайындалған шектеулер тергеу амалдары аяқталғанға дейін жалғасады. 

Еске салайық, бірнеше күн бұрын әлеуметтік желілерде Құлсары қаласындағы мектепте түсірілген бейнежазба тарады. Кадрда қолына балтаға ұқсас заты бар оқушы мектеп дәлізінде өзге бір жасөспірімді қуып жүргені байқалады.

Кейінірек Құлсары қаласындағы А.Пушкин атындағы №6 мектептің директоры қызметінен босатылғаны белгілі болды. Ал оқу-ағарту министрі Жұлдыз Сүлейменова бұл жағдайға қатысты пікір білдіріп, жауапкершілікті тек мектеп директорына ғана арта салуға болмайтынын айтты.

Оқи отырыңыз:

• Құлсарыда жеті жасар қызды азаптап өлтірген қылмыскер өмір бойына қатаң режимдегі түрмеге тоғытылды
• Құлсарыда салынып жатқан «жайлы мектептің» төбесі құлады