Ақтөбелік емші Динара Сәтжан мен Баян Алагөзоваға тиісіп, істі болды

«Жезөкше» дегені үшін жауап бересің деп ашуланған Динара Сәтжан ақтөбелік емшіге қатысты полицияға шағым түсірді. Оның артынша Баян Алагөзова да бұл іске көз жұма салмай, құқық қорғау органдарына арызданатынын айтты,  деп хабарлайды Orda.kz.       

Қазақстандық тележүргізуші әрі блогер Динара Сәтжан Ақтөбеде өзін «емші» ретінде таныстырған Бағдагүл есімді әйелге қатысты құқық қорғау органдарына ресми түрде арыз түсірді. Даудың туындауына емші әйелдің әлеуметтік желілерде жарияланған бейнеүндеулер мен қорлау сипатындағы мәлімдемелер себеп болған.

Оқиға Динара Сәтжанның Ақтөбе қаласында өткен жеке брендті дамытуға арналған жеке дәрістен кейін өршіген. Аталған шараға спикер ретінде барған Сәтжанды жергілікті емші Бағдагүл ашық сынға алып, оны жанама түрде меңзеп, билік өкілдерін «жеке іс-шараға бюджет қаражатын жұмсады» деп айыптаған.

Кейін әлеуметтік желілерде жарияланған видеоларда емші блогерге және басқа да танымал тұлғаларға қатысты ауыр айыптаулар айтып, түрлі балағат сөздер қолданған. Солардың ішінде Динара Сәтжанға бағытталған қорлайтын сөздер де болған.

«Бұл – жария қорлау» деп ашуланған Динара Сәтжан өз Instagram парақшасында бұл әрекетті заң аясында қаралатынын мәлімдеді.

«Ол мені өз сөздерімен қорлады. Бұл – жария қорлау және Қазақстан Республикасы Қылмыстық кодексінің 131-бабы бойынша жауапкершілікке жатады», – деді ол.

Сондай-ақ тележүргізуші өзіне қатысты айтылған «мемлекеттік қаржы алды» деген ақпаратты жоққа шығарды. Оның айтуынша, ол ешқандай мемлекеттік тендерге қатыспаған және бюджеттен қаражат алмаған.

Енді Сәтжан мен оның адвокаттары бұл істе тек полицияға арыз берумен тоқтамаған. Олар Ақтөбе облысының Экономикалық тергеп-тексеру департаментіне де ресми сұрау жолдаған.

Онда мына мәселелерді тексеру сұралған:

• емші қызметінің заңдылығы;
• дәстүрлі емес медицинамен айналысуға лицензиясының бар-жоғы;
• ақылы «бата беру» қызметінен түскен қаражаттың қайда жұмсалатыны;
• биологиялық белсенді қоспаларды сатуға құқығы бар-жоғы.

Сонымен қатар дәл осы емшіге қатысты Баян Алагөзова да сотқа жүгінбек. Соңғы кезде бұл дауға продюсер Баян Алагөзова да араласты. Оның айтуынша, емші ұзақ уақыт бойы әлеуметтік желілерде өзін, Динара Сәтжанды және басқа да адамдарды қорлап, жалған ақпарат таратқан.

«Әлеуметтік желілер адамдардың аузына ие бола алмай қойды. Адамдар ойына не келсе, соны жаза береді. Ақтөбеде TikTok-та ақшаға бата беретін бір «емші» тұрады. Оның адамдарды емдеуге лицензиясы бар ма? Салық төлей ме? Бұл — бөлек әңгіме. Бірақ көз жұма қарауға болмайтын нәрселер бар. Ұзақ уақыт бойы ол тікелей эфирде  мені, Динара Сәтжан мен басқа да адамдарды қорлап келеді. Мен, Динара және басқа адамдар туралы жалған ақпарат таратып жүр. Менің жобаларыма мемлекеттен ақша алады деп мәлімдеді. Бұл — өтірік және бұл — Заңның бірден бірнеше бабын бұзу. Қазір бұл мәселемен менің заңгерлерім айналысып жатыр. Мен өзімді қорлауға жол бермеймін.
Және өзім туралы жалған ақпарат таратуға да жол бермеймін. Егер біреулер осылайша өзіне трафик жинамақ болса, сот күтіп тұрғанын біліп қойыңыздар. Ал кейін адвокаттарға кеткен барлық шығын да сол адамнан өндіріледі. Осындай бір әйелді мен сотта жеңіп шыққанмын» деп жазды ол. 

Арыздан кейін Бағдагүл әлеуметтік желілерде жаңа видеоүндеу жариялап, өз сөздерінен бас тартпайтынын айтты. Айтуынша  ол «ана тілінде сөйлемейтін қазақтар» мәселесін көтеріп, Сәтжан мен Алагөзованы «ұлтқа қауіп» төндіретін адамдар ретінде сипаттаған.

Сонымен қатар, ол өзіне ең көп дегенде айыппұл салынуы мүмкін деп есептейтінін айтқан.

Осылайша, әлеуметтік желідегі жанжал енді құқықтық деңгейге өтіп, сотта қаралуы ықтимал резонансты іске айналып отыр.

Әйгілі қазақстандық медиатұлғалар Динара Сәтжан мен Баян Алагөзова ақтөбелік Бағдагүл есімді интернет-емшімен болған жанжалдың ортасында қалды.

Іске шындап кіріскен қос құрбы әйелді қорлағаны үшін қылмыстық жауапкершілікке тартып, оның миллиондаған табысының заңдылығын тексеруге ниетті.

Оқи отырыңыз:

• Баян Алагөзова Меруерт Өтекешоваға өмір бойына ай сайын 1 миллион теңге зейнетақы береді
• Баян Алагөзова: «Қыз Жібектің» қамзолы 50 жыл ешкімге керек болмады
• Министрлік Баян Алагөзованың «Қыз Жібек» фильміндегі киімге қатысты жариялаған жазбасына пікір білдірді