Қожамұратова ісінде 392 құжат жарияланып, 298 жәбірленушіден жауап алынды

Арайлым Қожамұратова ісінде 392 іс құжаты жарияланып, 298 жәбіленушіден жауап алынды. Сот сотталушылардан жауап алуды бастады, деп хабарлайды Orda.kz. 

Алматы қаласы кәмелетке толмағандар істері жөніндегі мамандандырылған ауданаралық сотында Арайлым Қожамұратоваға қатысты кезекті сот отырысы өтті. Cот отырысында негізінен сотталушылардан, яғни Арайлым Қожамұратовадан жауап алу басталуы тиіс еді. Алайда судья Самал Кеңесова бұған дейін жарияланған 352 іс құжатына қосымша тағы 40 құжат бар екенін айтып, оларды жариялауды ұйғарды.

Сот залына уақытша ұстау изоляторынан 10 сотталушы жеткізілді. Сонымен қатар, үш сотталушы кепілмен босатылып, сот процестеріне қатысып жүр. Еске сала кетейік, бұл іс бойынша Арайлым Қожамұратовадан бөлек тағы 13 адам сотталушылар қатарында. Олардың басым бөлігі — оның жақын туыстары. 

Айта кетейік, бұған дейінгі сот отырыстарында Арайлым Қожамұратоваға қатысты 352 іс құжаты жарияланып, 298 жәбірленуші мен 7 куәгерден жауап алынған. Жәбірленушілердің көпшілігі Қазақстанның әр өңірінен болғандықтан, сот отырыстарына негізінен онлайн форматта қосылды.

Іс материалдарын жариялау барысында тіркелген екі дискіде Қапшағай тас жолы бойында орналасқан қоймадан тергеушілер тергеу барысында Қожамұратоваға тиесілі тауарларды үш контейнерге тиеп алғаны көрсетілген. 

Қорғау тарапының адвокаты Рышқалиев қоймадағы осы тауарларға қатысты сараптама жасалмағанын айтты. Сонымен қатар, оның сөзінше, үш контейнердегі тауар негізінен жәбірленушілердің жартысына таратылуы тиіс болған, алайда олар бұл тауарды әлі күнге дейін ала алмай отыр.

Судья бұл мәселеге кеңесу бөлмесінде құқықтық баға берілетінін мәлімдеді.

Еске салайық, іс 2023 жылы тергеле бастағанымен, сот процесі тек 2025 жылдың мамыр айында басталды. Айс Мұратова есімімен танымал кәсіпкер Арайлым Қожамұратова Қытайдан арзан тауар әкелемін деп азаматтардан ақша жинап, уәде етілген тауарды жеткізбеді деген күдікпен ҚР Қылмыстық кодексінің 190-бабы 4-бөлігінің 2-тармағы (алаяқтық) бойынша айыпталып отыр.

Келесі сот отырысы 26 ақпанда өтетін болады,  Orda.kz сот залынан хабар тартауды жалғастырады.

Оқи отырыңыз:

• Қожамұратова ісі: сотта 49 жәбірленушінің жауабы оқылып, 56 том құжат жарияланды
• Айс Мұратова мен туыстары 32 күн бойы тергеу изоляторында заңсыз қамақта отырды ма?