Коуч пен психологтардың құқықтық мәртебесі заңмен айқындалмақ

Заңға сәйкес психологтардың бірыңғай мемлекеттік тізілімі енгізіледі, деп хабарлайды Orda.kz.

Мәжіліс депутаттары «Психологиялық қызмет туралы» заң жобасын бірінші оқылымда мақұлдады. Бұл тізілімге ену кәсіби қызметпен айналысудың міндетті шарты болады. Сонымен қатар психологиялық қызмет медициналық қызметтен нақты ажыратылып, психологтарға дәрі-дәрмекпен ем жүргізуге тыйым салынады. Бұл халықаралық тәжірибеге сай келіп, азаматтардың қауіпсіздігін қамтамасыз етуге бағытталған.

Әлеуметтік-мәдени даму комитетінің мүшесі Айна Мысырәлімованың  айтуынша, соңғы жылдары коучинг қызметтері нарығында белсенді өсім байқалады. Алайда бұл саладағы қызметтердің бағыты да, мазмұны да әркелкі, кей жағдайда қоғамда күмән туғызатын тұстары бар. Осыған байланысты заң жобасы психологиялық қызмет пен коучингтің аражігін құқықтық тұрғыдан нақты айқындауды көздейді.

«Біріншіден, біз психологтың құқықтық мәртебесін нақты белгілейміз. Психолог деп тек біліктілік талаптарына сай келетін, өз құзыреттерін растаған және мемлекеттік тізілімге енгізілген тұлға ғана танылады. Басқа адамдардың азаматтардың психоэмоциялық жағдайымен жұмыс істеуге құқығы болмайды. Екіншіден, психологиялық қызмет кәсіби стандарттарға қатаң түрде байланыстырылған. Ал коучинг бөлек реттеледі және азаматтардың психоэмоциялық жағдайымен жұмыс істеуге құқық бермейді», – деді Айна Мысырәлімова.

Сондай-ақ заң жобасында психологтардың құзыреті мен біліктілігіне қойылатын талаптарды айқындайтын кәсіби стандарт енгізу, психологиялық көмекті офлайн, онлайн және аралас форматта көрсету тәртібін белгілеу қарастырылған. Құжатта адам мен азаматтың құқықтары мен бостандықтарын шектейтін нормалар жоқ екені атап өтілген. Мәжіліс комитеттері заң жобасына оң қорытынды берген.

Оқи отырыңыз:

• «Сен сияқтыларды колонияға қамау керек»: Алматы облысында болған оқушы өліміне кім кінәлі?
• АҚШ пен Иран 14 күнге бітім жариялады: Тоқаев құптады
• Қазақтың келінге қатысты салт-дәстүрлері мен ат тергеудің тәрбиелік мәні