Қостанай облысында әкімнің орынбасары кеңсесін жөндеймін деп сынға қалды

Желіде Қостанай облысы әкімінің орынбасары қызу талқыланып жатыр, деп хабарлайды Orda.kz. 

«Письма президенту» телеграм арнасында Қостанай облысы әкімінің орынбасары Гүлбарам Мұсағазинаның өз кеңсесіне күрделі жөндеу жүргізіп, құрылыс нормаларын бұзғаны жазылған. Ол орынбасарлық қызметке 2024 жылдың шілдесінде кіріскен екен. Содан бірнеше ай өткен соң кеңсесіндегі құрылыс нормаларын бұзып, ғимарат дәлізіне дәретхана орнатыпты. Ал оған ең жақын кәріз құбыры ғимараттың басқа жағында орналасқан екен. 

Әкімдік бұл ақпаратты растамады. Олардың мәліметінше, Мұсағазинаның кеңсесінің қабырғалары ғана сырланған. Әрі әкім орынбасары жөндеу жұмыстарының ақшасын өзі төлепті. 

Әкімдік кеңсе ішінің өзгермегенін айтады. Алайда нысан ішін көруге ниетті журналистерді әкімдік қызметкерлері кіргізбей қойған. Себебі әкім орынбасарларының кеңсесі шектелген аумақ санатына жатқызылады екен.