Қордайда 15 жастағы қызды былтыр өз әкесі, биыл кіндік әке-шешесі зорлады

Қордайда 15 жастағы қызды кіндік әке-шешесі зорлап, оның көзінше жыныстық қатынасқа түскені белгілі болды, деп хабарлайды Orda.kz. 

Бұл туралы адвокат Азамат Талғатұлы әлеуметтік желідегі парақшасында айтты. Адвокат қызды өткен жылы өз әкесі, ал осы жылдың наурыз айында кіндік әке-шешесі зорлағанын мәлімдеді. Күдіктілер қыздың үйіне жиі келіп, аралас-құралас болған. Олар кәмелеттік жасқа толмаған қызды еркінен тыс қинап, ішімдік ішкізіп, кейін зорлаған. Биыл мұндай сұмдықты көрген қызды былтыр өз әкесі зорлаған еді. 

Бұл күдіктілер қыздың анасымен жақын араласқан. Жантүршігерлік оқиға болатын күні де қызды анасынан өздері сұрап әкеткен. Тіпті әйелді алдап, қарызға ақша да алған. Алаяқтық бойынша қылмыстық іс қозғалды. 

Осы жағдайдан кейін жәбірленуші қыз туыстарына бар жағдайды айтып берді. Осы іс бойынша Қордай аудандық полиция бөліміне арыз жазылып, КР ҚК-нің 121-бабымен қылмыстық іс тіркеліп, тергеу амалдары басталды. 

Еске салайық, Атыраудың Ракуша ауылында ер адам өгей қызына 5 жыл бойы жыныстық сипаттағы іс әрекеттерді зорлықпен жасап келгені белгілі болды.