Қонаевтағы сот: Алмасбек Садырбайға қандай айып тағылып отыр?

Қонаевта 1,2 млрд теңге жымқырды деген күдікке ілінген Алмасбек Садырбайға қатысты кезекті сот отырысы өтіп жатыр, деп хабарлайды Orda.kz.

Еске салсақ, Алмасбек Садырбай 2024 жылғы 6 қарашада 1,2 миллиард теңге жымқырды деген күдікпен қамауға алынған еді. Іс бойынша тергеу мен сот процесі бір жарым жылдан бері жалғасып келеді.

Алайда судья сот залындағы Orda.kz тілшісіне ұялы телефонмен түсірілім жасауға рұқсат бермеді. Оның сөзінше, сот процесін тек кәсіби камерамен түсіруге болады.

Қазіргі уақытта сот залында айыптау актісі оқылуда. Оған Қылмыстық кодекстің үш бірдей бабы бойынша айып тағылып отыр. Нақтырақ айтқанда, ол алаяқтық, ұйымдасқан қылмыстық топ құру және оған жетекшілік ету, сондай-ақ қылмыстық жолмен табылған қаражат пен мүлікті заңдастыру баптары бойынша жауапқа тартылуда.

Алмасқа Қылмыстық кодекстің 190-бабы (алаяқтық), 262-бабы (ұйымдасқан топты, қылмыстық ұйымды құру және оған басшылық ету, сондай-ақ оған қатысу), 218-бабы (қылмыстық жолмен алынған ақша мен өзге де мүлікті заңдастыру бойынша айып тағылып отыр.

Айта кетейік, істі судья Нұрсұлтан Қойшыбаев қарап жатыр. Ол отырыс барысында БАҚ өкілдеріне ұялы телефонмен видео түсіруге тыйым салып, процесті тек кәсіби камерамен ғана таспалауға рұқсат берді.

Қоғам белсендісі әрі сарапшы Алмасбек Садырбай сот отырысында өзіне тағылған айыптармен мүлдем келіспейтінін мәлімдеді. Оның сөзінше, қылмыстық іс негізсіз қозғалған және айыптау актісінде нақты айғақтар келтірілмеген.

Өз әрекеттерін түсіндірген ол ешқандай заң бұзушылыққа жол бермегенін, ал атқарған жұмыстары тек Қазақстанның агроөнеркәсіп кешенін қолдау мен дамытуға бағытталғанын алға тартты.

Оқи отырыңыз:

• «Бізге ешкім ескерткен жоқ»: Hilton дауына байланысты қонақүй өкілдері сот орындаушысымен сөзге келді
• «Әуе таксиі» Алматы маңында ұшты: Alatau City-де eVTOL алғаш рет көрсетілді