Қонаев қалалық сотының төрағасы 4 жылға сотталды

Қонаев қалалық сотының төрағасы қызметін атқарушы Жайық Жанболатов 4 жыл 6 айға бас бостандығынан айырылды, деп хабарлайды Orda.kz.

Алматы облысы Қарасай аудандық сотының үкімімен Жайық Жанболатов ҚР ҚК 190-бабы 3-бөлігінің 1 және 2-тармақтарына сәйкес алаяқтық жасағаны үшін кінәлі деп танылып, орташа қауіпсіздік мекемесінде 4 жыл 6 айға бас бостандығынан айыру жазасы тағайындалды. Сонымен қатар, Жанболатовқа өмір бойына мемлекеттік қызмет атқаруға тыйым салынды.

Іс материалдарына сәйкес, Жанболатовқа жауапты мемлекеттік лауазымды тұлға бола отырып, өзінің қызметтік жағдайын заңсыз пайдаланып, материалдық пайда алуға тырысты деген айып тағылған.

Жанболатов президенттің 2022 жылғы 28 желтоқсандағы жарлығымен Қонаев қалалық сотының төрағасы қызметіне тағайындалған.

Бұған дейін Қонаев сотының кейбір шешімдері біржақты болғаны туралы жазғанбыз.