«Басы дауға қалған полицейлер»: Облыстық сот даулы мәселенің нүктесін қойды

Қонаев қаласында сот 2022 жылы түсірілген бейнежазба негізінде жұмыстан босатылған екі полицейдің жұмыстан шығарылуын заңсыз деп таныған болатын. Осы мәселеде облыстық сот Қонаев қалалық сотының шешімін құптамады. 

Бұл туралы Алматы облыстық соты мәлімдеді. 

Даулы мәселеге түрткі болған ақпан айында блогердің түсірген бейнежазбасында полиция қызметкерлерінің  жүргізушілерді «тексеріске» алып барып, тіпті әжетханаға дейін бірге жүріп, алкоголь анализін тапсыру үшін жұмсағаны көрсетілген.

Қызметтік тексеру нәтижесінде полиция қызметкерлері жұмыстан шығарылды. Бірақ бұл шешімге қарсы Қонаев қаласының сотына шағым жазылды. Ол кезде іс инспекторлардың пайдасына шешілді. Басқарма оларды жұмысқа қайта қабылдауға және дауды шешкен уақыттағы жалақыны төлеуге міндеттелді.

Қазіргі таңда облыстық сот басқарманың апелляциялық шағымы негізінде Қонаев сотының шешімі біржақты болғанын және құқықтық нормаларды бұзғанын айтып, Қонаев сотының шешімін құптамайтынын мәлімдеді.