«Көлік иесі де ажал құшқан»: Ақтөбеде бөтен көлікке мінген 16 жастағы жасөспірімнің денесі көлден табылды

Ақтөбеде 16 жастағы жасөспірім мезгілсіз көз жұмды. Ислам Төреғалидың денесі Ілек көлінен табылды. Марқұмның туыстары жасөспірімнің өзіне қол жұмсағанына сенбейді.

Orda.kz тілшісі Ислам Төреғалидың отбасына көңіл айтып, істің жай-жапсарын сұрады. 

Марқұмның әпкесі Нұрханым Төреғалиеваның айтуынша, қайғылы оқиға 30 қараша күні Ақтөбеде болған. Исламды аймақтағы монша басшысы адам көп екенін айтып, жұмысқа шақырыпты. Жасөспірім түскі 15:00 шамасында үйден шығып моншаға бет алған. 16 жастағы Ислам 23:59-да моншадағы жұмыстарын бітіріп, үйге қайтпақ болған. Қолына мысығына деп алған қалдық тамақтары болады. 

16 жастағы жасөспірім үйге қайтар жолда қуыс жолдан өтуі керек болған. Ал ол маңға 23:46 да бір көлік кеп тоқтайды. Қараңғы, қуыс жер болғандықтан көліктің мемлекеттік нөмірі және ішінде кімнің бар екені көрінбейді. 

Ұлының үйде жоқ екенін ата-анасы түнгі 3:00 шамасында байқап, монша басшысына хабарласып, іздей бастайды.
1 желтоқсан күні 16:00-де Ислам мінген көлік табылды. Көліктің ішінде жан пендесі жоқ, кілті де табыла қоймаған. Көліктің алдына отырған Исламның ұялы телефоны көліктің артқы орындығында жатқан. Ол жерден жүргізушінің де телефоны табылған. Сонымен қатар, жағадан тағы бір телефон табылады. 

Өкінішке қарай, сол күні кешкі сағат 19:00-де Ислам Төреғалидың денесі судан табылды. Сот экспертизасы марқұмның денесінен зорлық белгілерін таппады. 

Келесі күні, 2 желтоқсанда жүргізушінің де денесі судан табылды. 

Марқұмның отбасы тергеу жүріп жатқанын, бірақ полиция ешқандай ақпарат бермегенін айтып, наразылық білдірді. Исламның әпкесі нақты не жағдай болғанын білу қиын болып тұрғанын айтты. 

Ислам Төреғали Қ.Жұбанов атындағы Ақтөбе өңірлік мемлекеттік университетіне барып сөз сөйлеуі керек болған күні денесі табылды. Енді жастай көз жұмған жігіттің туыстары тергеудің әділ жүріп, шындықтың бүкпесіз ашылуын талап етіп отыр. 

Айта кетейік, Ақтаудағы аялдамалардың бірінен ер адамның мәйіті табылды.