Көкшетаудағы мүгедектік ала алмай жүрген әйелге қатысты әкімдік жауап берді

Көкшетау қаласының «Қызылжар ауылдық округі әкімінің аппараты» 19 қарашада Orda.kz сайтының арнайы сауалына жауап берді.

Orda.kz бұған дейін Ақмола облысындағы 85-тегі қарт анасы мен жасөспірім баласы бар,  көктемде ауласын су басқан соң, көк сасыған, сыз үйде тұрып жатқан жалғызбасты әйел туралы жазған болатын.

Редакциямызға хабарласқан Гүлзира Рамазан үйін көк басып, сыздан өзінің ауру болғанын жеткізген. Оның сөзінше осы суық пен сыздан ауырып, ауруханаға бірнеше рет жатып шыққан. Қазіргі кезде сыздан өкпесі зақымданған әйел мүгедек ретінде тіркеле алмай жүр. Жалғызбасты Гүлзира Рамазанның қарауында 85 жастағы қарт анасы мен 12 жасар баласы бар.

Әкімдік мәліметіне қарасақ, 6 қарашада жүргізілген медициналық комиссия дұрыс тексеру жүргізе алмаған, себебі науқас теріс пікірде болып, тексеру бөлмесінен шығып кеткен. Бұл жайлы Гүлзира Рамазан өзі де айтқан болатын. Содан пациентке аллергологқа консультацияға бару және қосымша тексерулерден өту ұсынылды. 

Сонымен қатар, Қызылжар ауылдық округінің әкімдігі мүгедектік рәсімдеуде ешқандай қысым болмағанын атап өтті, өйткені бұл процесс жергілікті әкімдіктің емес, денсаулық сақтау басқармасының құзыретінде.

Ал әлеуметтік көмек бойынша, Гүлзира Рамазанға табиғи апат салдарынан көмек көрсетілгендігі айтылды.

Алайда қазіргі тұрып жатқан үйінің тексеріліп жатқаны жайлы дерек айтылмады. Бұған дейін Гүлзира Рамазан үйін тексеріп адамдардың келгені жайлы хабарлаған болатын.

Еске сала кетсек, ол көктемде үйінің ауласын су алғаннан кейін жағымсыз иіс пен көк басып, сыз болып, өзінің ауру болып қалғаны жайлы айтқан еді.