Көбейтұз көлі ерекше қорғалатын аумақтар қатарына қосылады

Ақмола облысындағы елордадан шамамен 160 шақырым жерде орналасқан әйгілі Көбейтұз көлі президент тапсырмасымен ерекше қорғалатын табиғи аумақ мәртебесіне ие болады, деп хабарлайды Orda.kz.

Бұл үшін Бұйратау ұлттық паркі аумағы кеңейтіліп, оның құрамына көлдің акваториясы енгізіледі. Билік осылайша көлдің бірегей экожүйесін сақтауды көздеп отыр.

Сонымен қатар, су айдыны маңында абаттандыру жұмыстары жүргізіледі. Жағалау аумағында автотұрақ пен бақылау алаңы салынып, туристерге табиғатқа зиян келтірмей көлді тамашалауға жағдай жасалады.

Жұмыс жүргізілген кезеңде көлге кіру шектеледі.

«Жағалау сызығына жақындауға және ұсынылған аймақтан тыс аумақта болуға тыйым салынады. Кіру орындарында тәулік бойы бекеттер қойылып, аумақты полиция мен уәкілетті органдар бірлесіп патрульдейді» деп жазылған өңір әкімдігі хабарламасында. 

Бұған дейін мамандар көл суына зерттеу жүргізген. Сараптама нәтижесінде аммиак, аммоний азоты, хлоридтер, мышьяк және сульфаттар сияқты бірқатар заттардың шекті мөлшерден асқаны анықталған.

Көбейтұзда суға түсуге және жағалаудан тұз жинауға тыйым салынған.Туристер көлдің түбінен қызғылт тұз жинап, оны интернетте бір келісін бес мың теңгеге дейін бағалап, сатады. Бұл көлдің бірегей экожүйесіне айтарлықтай зиян келтіріп жатқаны сөзсіз.

Біз былтыр тұз сатқыштар атақты  Көбейтұз көліне қауіп төндіріп отырғанын жаздық.  2025 жылдың жазында билік интернетте сату үшін тұз жинаған туристерге қатысты бақылауды күшейткен болатын.

Көбейтұз көлі — ағынсыз тұзды көл. Аумағы — 690 гектар, тереңдігі — 1,5 метрге дейін. Көл Ақмола облысының Ерейментау ауданында орналасқан.

Оқи отырыңыз:

• Тұз сатқыштар атақты Көбейтұз көліне қауіп төндіріп отыр
• Жыл соңына дейін теңізге 1,2 миллиард текше метр су құйылады: Арал қалпына келе ме?