Ким Чен Ын өзі қайтыс болған жағдайда ядролық соққы жасауды заңдастырды

12 мамыр 2026 09:05 Ләззат Сұңқар

Фото: Шетелдік БАҚ-тардан

Ким Чен Ын өзі қайтыс болған жағдайда автоматты түрде «ядролық түймені» басып, соққы беру туралы норманы Конституцияға енгізіп, заңдастырып қойды, деп хабарлайды Orda.kz.

Солтүстік Корея ресми түрде өз Конституциясында ядролық держава мәртебесін және ел басшысының көзі жойылып немесе оған қастандық жасалған жағдайда әрекет ету алгоритмін бекітті.

Арнайы қызметтердің бағалауынша, Пхеньянның арсеналында 60-қа дейін ядролық оқтұмсық және шамамен 2000 келіден көп байытылған уран бар. Алайда енді Ким Чен Ынның оған да көңілі толмай, енді тіпті өзі қаза тапқан жағдайда да армияға жауапты соққы беруге міндеттеп қойды.

Конституцияға енгізілген өзгерістерге сәйкес, егер Ким Чен Ын өлтірілсе немесе шабуыл салдарынан әрекетке қабілетсіз болып қалса, армия дереу жауап ретінде ядролық соққы жасауға міндетті.

Заңдағы жаңартылған 3-бапта былай жазылған:

«Егер мемлекет ядролық күштерін басқару жүйесіне жау күштерінің шабуылы салдарынан қауіп төнсе, ядролық соққы автоматты түрде және кідіріссіз жасалады».

Шығыстанушы Андрей Ланьков The Telegraph басылымына берген пікірінде Пхеньян АҚШ пен Израильдің Таяу Шығыстағы көшбасшыларға қарсы жасаған соққыларының тиімділігіне қатты алаңдап отырғанын айтты.

Ирандағы жоғары лауазымды тұлғалардың жойылуы және «шешім қабылдау орталықтарына» соққы беру қаупі Кимді бір адамның көзін жою арқылы тоқтату мүмкін болмайтын жүйе құруға итермелеген.

Ядролық доктринадағы өзгерістерден бөлек, КХДР Конституциясынан Оңтүстік Кореямен бейбіт қайта бірігу туралы тармақтар алынып тасталды. Енді Оңтүстік ресми түрде «жау мемлекет» деп танылды.

Ал Ким Чен Ын өз мәртебесін одан әрі күшейтті. Мемлекеттік істер жөніндегі комиссия төрағасы ретінде ол ядролық арсеналдың жалғыз қолбасшысы әрі мемлекет басшысы рөлінде бекітілді.

Оқи отырыңыз:

заң ким чен ын ядролық соққы

Жаңалықтар

барлық жаңалықтар