«Киіз үй мен домбыраны қорлады, енді туға жармасты»: Ермұрат Бәпи экстремистік күштердің әсері туралы айтты

Мәжіліс депутаты Ермұрат Бәпи экстремистік күштердің қоғамға әсері туралы депутаттық сауал жолдады. Туға арабтың жазуын жазған қыздарды мысал етіп, оны қоғамды бүлдіруге бағытталған әрекет ретінде қарастыру қажет екенін айтты, деп хабарлайды Orda.kz.

Депутат домбыраны «харам» дегендерді еске салып, сонымен қатар маркетплейстерде араб тілінде діни жазулары бар Қазақстан туын сатқандарды атап өтті.

«Біздің назарымызды аударған көк тудағы араб қаріпіндегі жазудың өте сапалы түрде арнайы баспа құралымен таңбаланғандығы. Бұл – біздің қоғамымызға, мемлекетімізге, ұлттық дәстүрлеріміз бен бірегейлігімізге ашық және нақақ қарсылық», – деді Бәпи, Мәжілістің пленарлық отырысында депутаттық сауалын айтып жатып.

Елдің туын бүлдіріп, жат пиғылды дәріптемек болған төрт қыз әлдебір араңдатушылық топтың құрбаны болуы мүмкін. Мәжіліс мүшесі сондай-ақ Қазақстанның зайырлы мемлекет екенін еске салды, мұнда ешкім дінге қатысты көзқарасы үшін ешқандай кемсітушілікке ұшырамауы тиіс.

«Бұл арандатушылық жеке адамдардың діни көзқарастарын білдіруге емес, қоғамның тұрақтылығына, мемлекеттің тұтастығына қауіп төндіруге бағытталған. Бұл әрекетті діндер арасындағы бірлікті және қоғамды бүлдіруге бағытталған зұлым әрекет ретінде қарастыру керек», – деп атап өтті Бәпи.

Еске сала кетсек, бұған дейін Қазақстан туына арабша жазу жазған никабтағы қыздарға жаза тағайындалды.