«Кезби» директорының үстінен сотқа дейінгі тергеу басталды

«Кезби» компаниясының қаражатын жымқыру және салық төлеуден жалтару дерегі бойынша сотқа дейінгі тергеу басталды, деп хабарлайды Orda.kz.

Маңғыстау облысы бойынша қаржылық мониторинг департаменті «Кезби» ЖШС компаниясының атқарушы директоры Ержан Кезбаевқа қатысты ҚК 190-бабының 4-бөлігі, 2-тармағы («Өте ірі мөлшердегі алаяқтық») бойынша қылмыстық іс қозғады.

«Ол «ӨзенМұнайГаз» АҚ қызметкерлерінің жалақысын төлеуге бөлінген 321 миллион теңгені жымқырды, сондай-ақ 1,5 миллиард теңге көлемінде салық төлеуден жалтарды деп күдіктелуде. 2021 жылы «Кезби» ЖШС «ӨзенМұнайГаз» АҚ-мен сағатына 65 мың теңге бағасымен жөндеу жұмыстарын жүргізу туралы келісімшартқа отырған болатын»,  деп мәлімдеді департамент.

Департамент мәліметіне қарасақ, кейіннен жұмысшылардың әлеуметтік пакетін, оның ішінде жалақы мен медициналық жәрдемақыны арттыру мақсатында баға сағатына 87 мың теңгеге дейін көтерілген.

Алайда, тергеу болжамына сәйкес, қаражаттың елеулі бөлігі, яғни 321 миллион теңгені компания басшылары қызметкерлердің әлеуметтік жағдайын жақсартуға жұмсамайй, керісінше жымқырған.

Еске сала кетсек, 2024 жылдың 3 қарашасында күдікті Кезбаев қамауға алынды.

«Кезби» – ел тәуелсіздігін алғаннан кейін құрылған алғашқы жеке компаниялардың бірі саналатын мұнайсервистік компания. Компанияның тіркеу құжаттары 26 жыл бұрын, 1998 жылы рәсімделген.

Компанияның алғашқы басшысы және қазіргі құрылтайшысы Бітім Кезбаев кәсіби шахта бұрғылаушысы. Ол өз еңбек жолын «Маңғышлақмұнайгазбарлау» тресінде бұрғылаушы болып бастаған. 2012 жылы Forbes басылымы оны «Үздік кәсіпкерлер» тізіміне қосты.

Тек 2009-2011 жылдар аралығында компания «Алтын Феникс» және «Еуропалық экономикалық кеңістіктегі үздік компания» халықаралық сыйлықтарымен марапатталды. Сонымен қатар, ол еліміздің әлемдік мұнай-газ өндірісіндегі үлесін арттыруға қосқан үлесі үшін «Сала ардагері» атағын алды және «ҚазМұнайГаз» ҰК» АҚ мен «Өзенмұнайгаз» компанияларынан алғыс хаттары бар.

Алайда, компания жетістіктеріне қарамастан, басшылық пен қызметкерлер арасындағы қарым-қатынас нашар. Соңғы бірнеше жылда «Кезби» қызметкерлері еңбек жағдайларын жақсарту және жалақыны көтеру талаптарымен бірнеше рет ереуілге шықты.