Мұнайшылар көтерілген соң, «Кезби» директоры ұсталды

Маңғыстау облысында қаржылық жанжал өршуде. Қаржылық мониторинг агенттігі «Кезби» ЖШС атқарушы директоры Ержан Кезбаевқа қатысты қылмыстық іс қозғады, деп хабарлайды Orda.kz.

Оған «ӨзенМұнайГаз» АҚ қызметкерлерінің жалақысын көтеруге бөлінген 321 миллион теңгені жымқырды және шамамен 1,5 миллиард теңге салық төлеуден жалтарды деген айып тағылып отыр.

2021 жылы «Кезби» «ӨзенМұнайГаз»-бен сағатына 65 мың теңге мөлшерінде бригадалық жөндеу жұмыстарына келісімшарт жасасқан болатын. Кейін жұмысшылардың әлеуметтік пакетін, соның ішінде жалақыны және медициналық жәрдемақыны жақсарту мақсатында баға сағатына 87 мың теңгеге дейін көтерілген. Алайда тергеу мәліметтері бойынша, қаражаттың едәуір бөлігі басшылық тарапынан жымқырылып, жұмысшыларға жағдай жақсартылмаған.

2024 жылдың 3 қарашасында Кезбаев ұсталды. Қазіргі уақытта істің барлық мән-жайын анықтауға бағытталған тергеу әрекеттері жүргізіліп жатыр. 

Еске сала кетсек, Orda.kz осы компанияның жұмысшылары ереуілге шыққанын жазған болатын. Басшысы Ержан Кезбаевқа хабарласқан едік. Ол «ереуілге шыққан қызметкерлерімен келісуге тырысып жатқанын» айтқан еді.

«Кезби» – ел тәуелсіздігін алғаннан кейін құрылған алғашқы жеке компаниялардың бірі саналатын мұнайсервистік компания. Компанияның тіркеу құжаттары 26 жыл бұрын, 1998 жылы рәсімделген.

Компанияның алғашқы басшысы және қазіргі құрылтайшысы Бітім Кезбаев кәсіби шахта бұрғылаушысы. Ол өз еңбек жолын «Маңғышлақмұнайгазбарлау» тресінде бұрғылаушы болып бастаған. 2012 жылы Forbes басылымы оны «Үздік кәсіпкерлер» тізіміне қосты.

Тек 2009-2011 жылдар аралығында компания «Алтын Феникс» және «Еуропалық экономикалық кеңістіктегі үздік компания» халықаралық сыйлықтарымен марапатталды. Сонымен қатар, еліміздің әлемдік мұнай-газ өндірісіндегі үлесін арттыруға қосқан үлесі үшін «Сала ардагері» атағын алды және «ҚазМұнайГаз» ҰК» АҚ мен «Өзенмұнайгаз» компанияларынан алғыс хаттары бар.

Алайда, компанияның жетістіктеріне қарамастан, басшылық пен қызметкерлер арасындағы қарым-қатынас нашар. Соңғы бірнеше жылда «Кезби» қызметкерлері еңбек жағдайларын жақсарту және жалақыны көтеру талаптарымен бірнеше рет ереуілге шықты.