«Келінімізді араластырмаңыздар»: Руслан Берденовті атқан Ернар Жиенбайдың әкесі мәлімдеме жасады

Шымкент қаласы әкімінің орынбасары Руслан Берденовке қарулы шабуыл жасаған күдікті Ернар Жиенбайдың әкесі мәлімдеме жасады.

Ернар Жиенбайдың әкесі Жиенбай Пірәлиев Orda.kz тілшісіне 21 сәуір күні болған оқиғаға қатысты мәлімдеме берді.

Оқиғаға қатысты жаңа деректер мен күдіктінің кім екені жайлы тың мәліметтер шықты. Пірәлиевтің сөзіне қарасақ, ұлының ісіне әлі де сене алмай отыр. Әрі болған оқиғаға өкінетінін де жасырмады.

«Ата-ана үшін бұл жағдай нағыз ауыр соққы болды. Бүгінге дейін ұлымыз Ернардың осындай қиын жағдайға қалғанына сене алмай отырмыз. Осы оқиғаға байланысты шын жүректен өкінеміз. Қандай жағдай болмасын, бірінші кезекте Руслан Берденовтің тезірек сауығып кетуін тілейміз», — деді әкесі.

Сонымен қатар, Пірәлиев тергеудің жан-жақты қаралатынына сенім артып отырғанын, әрі бұл оқиғаға келіндерінің еш қатысы жоқ екенін мәлімдеді.

«Біз тергеу мен соттың барлық жағдайды әділ, жан-жақты қарастыратынына сенім артамыз. Баршаңызды сабырға шақырып, нақты шешім шықпай тұрып, асығыс қорытынды жасамауды сұраймыз. Ең бастысы – бұл жағдайға еш қатысы жоқ келінімізді араластырмауды өтінеміз. Ол Руслан Берденовті бұрын-соңды көрмеген де, танымайды да», — деді Жиенбай Пірәлиев.

Еске салсақ, Шымкент қаласы әкімінің орынбасары Руслан Берденовке қарулы шабуыл жасалды. Оқиға 21 сәуір күні кешкі сағат 20:30 шамасында қалалық әкімдік ғимаратының жанында болды.

Бастапқыда, Берденов оққа ұшты деген мәлімет пайда болғанда көптеген ақпарат көздерінде күдікті туралы оның бұрын қарамағында жұмыс істегені жайлы жазылды. Бұған дейін тараған полиция мәліметінде шабуыл жасауына «жұбайына тиіскені» себеп болды деген нұсқа да айтылды.

Сонымен қатар, Respublica партиясының тең төрағасы Бейбіт Әлібековтің айтуынша, оқиға Шымкенттегі құрылыс саласындағы тәртіп орнату әрекетімен байланысты болуы мүмкін. Сонымен қатар, Берденовке оқиға болар күні қоқан-лоққы көрсетілген.

Қазіргі уақытта, қарулы шабуыл жасалуына байланысты полиция кісі өлтіруге оқталу фактісі бойынша қылмыстық іс қозғады.

Сондай-ақ, мәжіліс депутаты Айдарбек Қожаназаров Шымкент әкімінің орынбасары Руслан Берденовке жасалған қастандыққа қатысты пікір білдірген еді.