ҚазТАГ агенттігінің басшыларына қарсы қылмыстық іс қозғалды

08 желтоқсан 2025 17:25 Альфия Адамбек

Фото: ҚазТАГ

ҚазТАГ редакциясы агенттікке қарсы қылмыстық іс қозғалғанын хабарлады, деп жазады Orda.kz.

Журналистердің айтуынша, іс ақпараттық агенттіктің басшылығына қатысты тіркелген. Freedom Finance мәлімдемесіне сәйкес, бас директор Әсет Матаев пен бас редактор Әміре Қасенов күдікті деп танылған.

Агенттік өкілдері «Матаев пен Қасеновті күдікті деп тану — құқықтық талаптарды елемеу» екенін айтты. Олардың сөзінше, «адамды оның қатысуынсыз күдікті деп тану үшін тергеуден қасақана жалтаруы керек, ал Матаев пен Қасенов тергеу шараларынан бой тасаламаған».

Редакция қылмыстық іс туралы 20 қарашада ғана басқа ақпарат құралдарынан білген. Іс тамыздың 18-інде қозғалған.

Журналистердің айтуынша, полиция бірнеше ай бойы істі редакциядан жасырған және «редакцияны хабардар етпей, белгіленген рәсімдерді бұзып бірнеше сараптама жүргізген».

Айта кетейік, адвокат Мұрат Адамның айтуынша, «Орда» сайтының негізін қалаған Гүлнәр Бажкенованы үйқамаққа қамау туралы үкім оның сотта өз мүддесін қорғауына кедергі келтіріп отыр.

Еске сала кетсек, құқық қорғаушы Галым Агелеуов «Дождь» телеарнасында Orda.kz жайлы сөз сөйледі. Ол Қазақстанда журналистерге еркіндік жоқ екенін атап өтіп, Гүлнәр Бажкеноваға қарсы қозғалған істердің саяси тапсырыс екенін ашық айтты.

Жаңалықтар

барлық жаңалықтар