«Қазір оған қысым жасау керек» – Зеленский Путин туралы ашық айтты

Украина Президенті Владимир Зеленский Ресей Президентінің әскери қақтығыстарды тоқтату шарттарына қатысты айтқан сөздерін «айлакерлік және айдан анық» деп бағалады. Оның пікірінше, қазірдің өзінде Путин майдандағы тыныштық идеясынан бас тартуға дайындалып жатыр, деп хабарлайды Orda.kz.

Зеленскийдің айтуынша, Ресей басшысы Трампқа соғысты жалғастырғысы келетінін ашық айтудан қорқады.

«Сол себепті Мәскеуде бұл «ымыраға келу идеясын» түрлі шарттармен айналдырып, оны не мүлде іске аспайтындай, не барынша ұзаққа созылатын етіп көрсетіп отыр. Путин мұндайды жиі істейді – тікелей «жоқ» деп айтпайды, бірақ процесті әдейі созбақтайды. Біз үшін бұл – Ресейдің кезекті айла-тәсілі»,  деп жазды Украина Президенті өз Telegram арнасында.

Ол АҚШ-тың бейбіт келісімді бақылау және растау механизмдерін ұйымдастыруға дайын екенін, әрі америкалық және еуропалық мүмкіндіктердің бұған толық жеткілікті екенін атап өтті. Сондай-ақ, Зеленский «ымыраға келу кезеңінде соғысты аяқтаудың нақты жоспарын дайындап, талқыға салуға болады» деді. Украина бұл үдерісте барынша жылдам әрі тиімді жұмыс істеуге әзір екенін білдірді.

«Біз қандай да бір шарт қойып, мәселені қиындатпаймыз. Керісінше, мұны Ресей жасап отыр. Путин бұл соғысты күнде жалғастырып келеді. Қазір оған қысым жасау керек. Шынайы нәтиже беретін санкциялар енгізу қажет. Біз америкалық және еуропалық серіктестерімізбен, сондай-ақ әлемде бейбітшілікті қалайтын барлық елмен бірлесіп, Ресейді соғысты тоқтатуға мәжбүрлеу үшін жұмыс істей береміз», – деп мәлімдеді Зеленский. 

Еске сала кетсек, кеше Владимир Путин алғаш рет Украинамен уақытша бітімге келу туралы пікір білдірді. Ол 30 күнге соғысты тоқтату келісімі – жақсы бастама екенін, бірақ талқылауды қажет ететін тұстары бар екенін айтты.