Ресей Украинамен 30 тәулікке бітім жасасуға дайын — Владимир Путин

Владимир Путин Ресейдің Украинамен 30 тәулікке бітім жасауды қолдайтынын айтты, деп хабарлайды Orda.kz.

Ресей президентінің айтуынша, ең маңыздысы – осы уақыт аралығында қандай қадамдар жасалатыны.

Сонымен қатар, ол бітім кезінде Украина мобилизация жүргізбейтініне, әскери дайындық жасамайтынына және қару-жарақ сатып алмайтынына кепілдік беруді талап етті.

«Курск облысы толықтай Ресейдің бақылауында.Украина әскері қоршаудан шыға алмайды», — деді Владимир Путин Беларусь президенті Александр Лукашенкомен кездесуден кейінгі бірлескен баспасөз мәслихатында.

Ресей президенті атысты тоқтату кезінде бақылау және тексеру мәселелері әлі де түсініксіз екенін айтты. Ол Украинадағы екі мың шақырымдық байланыс сызығында атысты тоқтату бұзылуын бақылауды өте күрделі мәселе деп санайды.  

«Бітімгерлік идеясы дұрыс, бірақ талқылауды қажет ететін мәселелер бар, оның ішінде АҚШ-пен де», — деді Владимир Путин. 

Сондай-ақ, ол Трампқа қоңырау шалып, келісімге келу мүмкіндігін қарастыруға дайын екенін жеткізді.

Президенттің көмекшісі Юрий Ушаковтың айтуынша, Владимир Путин бүгін кешке АҚШ президентінің арнайы өкілі Стив Уиткоффпен жабық есік артында кездеспек.