«Қазақтың қорқынышты ертегілері» бірден халықаралық үш байқауға аттанды

«Қазақтың қорқынышты ертегілері» («Казахские страшные сказки») атты сериал бірден халықаралық үш байқауға жіберілді, деп хабарлайды Orda.kz.

Қазақ ертегілеріндегі тылсым күштерді бір арнаға тоғыстырған сериал Монреальдағы Fantasia Festival аясында көрсетіліп, бірден үш халықаралық фестивальге жол тартты: Париждегі L'Étrange, Германиядағы Seriesly Berlin және Венадағы SLASH!

Оқиға өзегінде — тергеуші Біржан. Ол  тек нақты дерекке сенетін адам. Бірақ қазақтың шалғай ауылында ол ақылға сыймайтын дүниелерге тап болады: көне аңыздар, тылсым күштер және адамдардың жүрегінде жасырынған үрей.

Orda.kz редакциясы отандық туындыға ақ жол тілейді. 

Айта кетейік, режиссер Елзат Ескендір түсірген «Әбіл» фильмі 2025 жылы ақпанда Францияда өткен 31-ші Vesoul халықаралық Азия кинофестивалінде де үш бірдей жүлдені еншілеген болатын: Қазылар алқасының бас жүлдесі, Киносыншылар жүлдесі және NETPAC қазылар марапаты.

Бұған дейін Елзат Ескендір «Қазақфильм» аумағына кіре алмай жүргенін, бұл мәселенің түп-тамыры киностудия басшылығының қазақ тілді режиссерлерге деген көзқарасында жатқанын мәлімдеген еді. Ол тілшімізге берген сұхбатында осы «Әбіл» фильмін түсіргенде көрген қиындықтары мен мемлекеттен бөлінген қаржы жайлы ашық айтып берді.