«Қазақтың қайырымды Робин Гуды» күніне құмар ойынға 700 мың теңге құртқан

Алматыда «Қазақтың Робин Гуды» деген лақап атымен танымал «Елге көмек» қорының басшысы Ілияс Сәриевтің соты өтіп жатыр. Тергеу барысында оның серіктесі Ақтоты Дүйсееваның телефонынан табылған төлемдер Сәриевтің жылдар бойы букмекерлік кеңселерге ақша аударып келгенін дәлелдеді. Кейде тіпті күніне 700 мың теңгеге дейін ақшаны тек құмар ойынға жұмсағаны белгілі болды. 

Orda.kz «қайырымды» Ілияс Сәриевтің сотына қатысып, істің мән-жайын анықтап қайтты. 

Бүгінгі сот отырысында Ақтоты Дүйсееваның ұялы телефоны тексеріліп, банк қосымшасы арқылы Ілияс Сариевтің құмар ойындарға қанша ақша жібергені анықталды.

Судья ұсынған деректерге сәйкес, бір жылдың ішінде күніне 300 мыңнан 700 мың теңгеге дейін қаражаттар аударылған.

• 22 маусым 2024 жыл: 600 мың және 400 мың теңге;
• 25 маусым 2024 жыл: 500 мың теңге;
• 26 маусым 2024 жыл: 200 мың теңге;
• 30 маусым 2024 жыл: 500 мың, 300 мың және 150 мың теңге;
• 1 шілде 2024 жыл: 180 мың теңге;
• 14 шілде 2024 жыл: 700 мың теңге.

Судья бұл деректерді тікелей телефоннан оқып берді.

Дегенмен, Дүйсеева мұны 2023–2024 жылдары кассадан тұрақты түрде ақша ала бастады деп түсіндірді. Оның айтуынша, алдыңғы жылдары компания қаржысын жеке мақсаттарға және құмар ойындарға пайдаланған соң 2025 жылы кассада ақша жетіспеген.

«Мен өз банк қосымшамды Сәриевтің қолданғанын бірнеше рет айттым. Ол кассадағы тапшылықты жасыру үшін қажылыққа баратын бір топтың ақшасын екінші топтың қаражаты арқылы жауып отырдым. Оның 2023 пен 2024 жылы тұрақты түрде құмар ойындарға жұмсап келген қаражаттардың жетіспеуінің кесірінен осындай кассада қаражат тапшылығы болды. Ал 2025 жылдан бастап құмар ойындарға тікелей аударымдардың болмауының себебі бар. Мен оның қаражатты ойынға жұмсап жүргенін білген соң, ол маған: «қойдым» деп айтты. Артынша ол банк қосымшасынан таныстарына қомақты қаражатты аударып, солардың шоты арқылы құмар ойынға салып отырды», – деді сотта Дүйсеева.

Сотта жәбірленуші Гүлбахар Төрева мен Сәриев дауласып қалды. Бұған дейін Сәриев Төреваның мүгедектігі бар екі немересін рұқсатсыз бейнежазбаға түсіріп, «үйсіз» деп халықтан ақша жинағаны белгілі болған. Жиналған қаражат Ақтоты Дүйсееваға тиесілі шотқа түскен. Алайда бұл ақшаның нақты қайда жұмсалғанын Сәриев түсіндіре алмады. Ол тек Төреваға «көп көмектестім» деп ақталды.

Еске сала кетсек, қаражат жиналып болған соң, Сәриев үйі жоқ Төреваға «үй алып қойдық» деп сендіріп, түрлі сылтаумен оның өзінен тағы да шамамен 800 мың теңге алған. Ол бұл қаражатты сотта мойындағанымен, сол отбасыға көрсеткен азын-аулақ көмегін қайта-қайта айтып ақталды. Судья Сәриевтің берген көмектері садақа ретінде есептелетінін, сондықтан оны қарыз ретінде талап етуге болмайтынын түсіндірді.

Сотта сондай-ақ Сәриевтің қылмыстық іс қозғалғанға дейін «үй алып бердік» деп жариялаған бейнежазбалары көрсетілді. Журналист Руслан Өтепбай бұл бейнематериалдарды дәлел ретінде қабылдауға болмайтынын, өйткені Сәриевтің ісі бойынша талай адам баспанасыз қалғанын айтты.

Келесі сот отырысы 13 қарашаға жоспарланған. Соттың негізгі бөлігі аяқталды. Енді жарыссөз бен соңғы сөз қалды.

Еске сала кетсек, бұған дейін Сәриевтің қажылардың ақшасын құмар ойынға салғаны әшкере болған еді.

Orda.kz алдағы уақытта өтетін сот отырыстарына қатысып, тікелей ақпарат таратып отырады.