Қазақстандықтар Оңтүстік Кореядағы зауыттар мен клининг саласында заңды жұмыс істей алады

2028 жылдан бастап Оңтүстік Корея қазақстандықтарға E-9 жұмыс визасы бойынша квота бөле бастайды, деп хабарлайды Orda.kz The Korea Herald басылымына сілтеме жасап.

Қазақстан шетелдіктерді жұмысқа орналастыру жөніндегі мемлекеттік бағдарламаға, яғни Employment Permit System (EPS) жүйесіне қосылды. Қазақстан осы бағдарламаға қатысатын 18-ші ел атанды. Орталық Азия елдерінен бұған дейін Қырғызстан, Өзбекстан және Тәжікстан бағдарламаға қосылған.

EPS бағдарламасы Оңтүстік Кореядағы компанияларға жергілікті жұмыс күші жетіспейтін салаларға шетел азаматтарын заңды түрде жұмысқа қабылдауға мүмкіндік береді.

Енді қазақстандықтар зауыттарда, құрылыс саласында, фермаларда, қонақүйлерде және тазалық қызметтерінде жұмыс істеу үшін E-9 визасына өтініш бере алады.

Виза кемінде үш жылға беріледі. Кейін оның мерзімін тағы 22 айға ұзартуға болады.

Қазақстанның EPS бағдарламасына қосылуы бірнеше жылдан бері талқыланып келген. 2025 жылдың тамызында Қазақстанның Еңбек министрлігі корей тарапынан тиісті шешім күтіп отырғанын хабарлаған.

Бұған дейін 2025 жылы Оңтүстік Кореяда 15 мыңға жуық қазақстандық жұмыс істегені, олардың шамамен 11 мыңының заңсыз жұмыс істегені хабарланған болатын.

Осы жылдың қаңтарында Қазақстанның Еңбек министрлігі Оңтүстік Кореяда заңсыз жүрген азаматтарға айыппұлсыз және кейінгі шектеулерсіз елден ерікті түрде шығу бағдарламасын пайдалануды ұсынған.

жыл басында Алматы облысының әкімі Марат Сұлтанғазиев Корея Республикасының еңбек көші-қоны мәселелері жөніндегі делегациясымен кездесу өткізді. Корей тарабы кадрлар жетіспеушілігін сезініп отырған салаға шетелдік жұмыскерлерді тартуға бағытталған EPS бағдарламасының жұмыс істеу тәртібін ұсынды. Қазіргі уақытта Қазақстан осы жүйеге қосылу мүмкіндігі бойынша келіссөздердің екінші кезеңінен өтті.

Оқи отырыңыз:

• Алматы облысында Кореяға жұмысқа орналастыратын арнайы орталық ашылады
• Ми-8 тікұшағы апаты: БҚО-да төрт адамның қазасына себеп болған іс сотқа жетті