Қазақстандық спортшының допинг қолданғаны анықталды

Қазақстандық триатлоншы Әбусейіт Әлихан допинг қолданғаны үшін 3 жылға шектеу алды, деп хабарлайды Orda.kz.

Допингке қарсы ұлттық орталықтың мәліметінше, Әбусейіт Әлиханның сынамасынан эритропоэтин препараты табылған. Енді ол 2024 жылдың 5 тамызынан 2027 жылдың 5 тамызына дейін жарыстарға қатыса алмайды.

Триатлоншыдан сынама биыл 11 мамырда алынған. Ол 11-12 мамыр аралығында U23 санатындағы триатлоннан Қазақстан чемпионатына қатысқан еді. Бұл жарыста спортшы спринт қашықтығында сынға түсіп, күміс медаль жеңіп алған болатын.