Қазақстандық оқушылар биологиядан ең беделді халықаралық олимпиададан төрт медальмен оралды

Филиппинде мектеп оқушыларына арналған ең ірі зияткерлік жарыстардың бірі – биология пәні бойынша халықаралық олимпиада аяқталды, деп хабарлайды Orda.kz.

Биыл бұл додаға әлемнің 80 елінен 320-дан астам дарынды оқушы қатысты. Олардың қатарында Қазақстанның да құрама командасы бар.

«Біздің елдің құрамасындағы төрт оқушының бәрі қола медаль иеленіп, 100 пайыздық командалық нәтиже көрсетті»,  деп мәлімдеді ҚР Оқу-ағарту министрлігі.

Жеңімпаздар тізімі:

• Ерсұлтан Қайыркен – Павлодар облысындағы «Білім-инновация» лицей-интернатының 10-сынып оқушысы;
• Батыр Ержанұлы – Өскемен қаласындағы Назарбаев Зияткерлік мектебінің 11-сынып оқушысы;
• Айғаным Балташова – Астана қаласындағы Назарбаев Зияткерлік мектебінің 12-сынып оқушысы;
• Әліхан Әшірханов – Алматы қаласындағы «Білім-инновация» лицей-интернатының 8-сынып оқушысы.

Олимпиада екі кезеңнен тұрды – теориялық және практикалық.

Теориялық кезеңде оқушылар молекулалық және жасушалық биология, генетика, экология, эволюция және биосистематика бойынша күрделі есептерді шешті.

Практикалық турда зертханалық жұмыстар, микроскоппен жұмыс, үлгілерді талдау және биологиялық процестерді зерттеу тапсырмалары болды.

Министрлік мәліметінше, Қазақстан IBO олимпиадасына 1994 жылдан бері қатысып келеді. Осы уақыт ішінде еліміздің командасы:

2 алтын,
18 күміс,
56 қола медаль
және
12 құрмет грамотасын иеленген.

2024 жылы Қазақстан IBO олимпиадасын өзінде қабылдаған болатын және сол кезде де 100% нәтиже көрсеткен.

Жақында Қазақ оқушылары Австралияда өткен беделді математика олимпиадасында алты медаль жеңіп алды.   2203 жылы елімізде 23 оқушы әлемдік олимпиадалардағы жүлделі орындары үшін 65,5 миллион теңге алды.