Қазақстанда алаяқтық жасады деген күдікті түрік азаматы Черногориядан экстрадицияланды

Қазақстан Республикасы Бас прокуратурасы мен ҚР ІІМ Интерпол Ұлттық орталық бюросы қызметкерлері Қазақстанның Черногориядағы елшілігінің қолдауымен аталған елден аса ірі көлемде қаржы жымқырды деген күдікпен Түркия азаматын экстрадициялады. Ол қылмыстық жауапкершілікке тарту үшін Қазақстанға жеткізілді, деп хабарлайды Orda.kz.      

Тергеу барысында аталған тұлғаның құрылыс компаниясы басшысы болған 2022–2024 жылдар аралығында жалған келісімшарт жасасу және аффилирленген ұйымдар арқылы ақша аудару жолымен Алматы қаласындағы тұрғын үй кешендерін салуға арналған 6 миллиард теңгеден астам қаражатты жымқырғаны анықталды.

Қылмыс жасағаннан кейін күдікті шетелге қашып кеткен, оған халықаралық іздеу жарияланды.

2025 жылғы наурыз айында ол Черногория аумағында табылып, ұсталды. Кейін Қазақстан Республикасы Бас прокуратурасының сұрауы бойынша Қазақстанға экстрадицияланды.

Қазіргі уақытта күдікті тергеу изоляторына қамалды.

Аталған қылмыс бойынша  10 жылға дейін бас бостандығынан айыру және мүлкін тәркілеу жазасы көзделген.

Еске салсақ, былтыр шетелдік компаниялардың серверлеріне кіріп, компьютер деректерін шифрлайтын зиянды бағдарламалар орнатқан адам ұсталған болатын.

Оқи отырыңыз:

• Түркістан облысы арнайы прокурорлары шетелдіктердің интернет-алаяқтық фактісі бойынша тергеп-тексеруді аяқтады
• Алматыда жыл басынан бері 30-ға жуық шетелдік есірткі қылмысы үшін сотталды
• ҰҚК Қазақстанда шетелдіктерді заңдастыратын қылмыстық жолды анықтады