Қазақстанда АЭС салатын «Росатом» қандай технология қолданады?

«Росатом» басшысы Қазақстандағы АЭС құрылысына қатысты пікір білдірді, деп хабарлайды Orda.kz.

«Росатом» мемлекеттік корпорацияның бас директоры Алексей Лихачёв Қазақстанның Атом энергиясы агенттігінің мәлімдемесіне жауап берді. Оның айтуынша, Қазақстанда салынатын атом электр станциясы әлемдегі ең озық әрі тиімді жоба негізінде салынады.

«Бұл жобада ресейлік технологиялар қолданылады.  Әлемдегі ең заманауи АЭС-тердің бірі болады. Oнда ВВЭР-1200 реакторлары орнатылады. Алда әлі көп жұмыс бар және біз Ресей мен Қазақстан басшылығынан қолдау мен көмекті қуана күтеміз», – деп атап өтті Лихачёв. 

Айта кетейік, Қазақстандағы алғашқы толыққанды АЭС-ті салу құқығына Ресей, Қытай, Франция және Оңтүстік Корея таласқан болатын. Үміткерлердің бәрінде қажетті технологиялар бар. Бірақ соңғы апталарда басты таңдау ресейлік «Росатом» мен қытайлық CNNC деп аталып жүрді.

Таңдау «Росатом» компаниясына түсті. Orda.kz энергетика саласындағы сарапшылармен бірге осындай маңызды жобаға неге ресейлік компанияны таңдағандарын және бұл шешімнің артықшылықтары мен кемшіліктерін саралап көрген еді.