Қазақстанда 276 мыңнан астам вейп тәркіленді

Қазақстанда вейп айналымына тыйым салынғанына қарамастан, оларды заңсыз әкеліп, сататындар көбейіп отыр. Жыл басынан бері Қаржылық мониторинг агенттігі 25 заңсыз сату фактісін анықтап, 37 қылмыстық іс қозғаған. Заңсыз айналымнан 276 мыңнан астам электронды тұтыну жүйесі тәркіленді. 18 адамға қатысты 14 іс сотқа жолданды, деп хабарлайды Orda.kz.

Елордада вейп сатумен айналысқан қылмыстық топ анықталды. Олар өнімді жалға алынған қоймаларда сақтап, Telegram, WhatsApp және Zangi арқылы сатқан. Шоттар арқылы 3,2 млрд теңгеден астам қаражат өткен.

Қарағанды облысында Telegram-дүкен ұйымдастырғандар 2 жыл 6 айға бас бостандығын шектеу жазасына сотталды. Олардан құны 340 млн теңгеге жуық 30 мың вейп тәркіленді.

Ұлытау облысында екі адам вейп сатқаны үшін төрт жылға бас бостандығын шектеу жазасына сотталды. Олардың қылмыстық табысы тәркіленді.

Қаржылық мониторинг агенттігі вейптерді заңсыз әкелу, сақтау, тасымалдау және сатудың қылмыстық жауапкершілікке әкелетінін еске салды.

Оқи отырыңыз: 

• Алматыда бір тәулікте 2 мыңнан астам жол ережесін бұзу фактісі анықталды
• Ауғанстанда 2,4 миллион қыз орта білім ала алмай отыр