Қазақстан мен Украинаның арнайы қызметтері трансұлттық алаяқтарға қарсы операция жүргізді

Киев қаласында Қазақстан мен Украинаның полициясы бірлесіп, deepfake технологияларын пайдаланған ірі алаяқтық call-орталықты әшкерелеп, оның қызметін тоқтатты, деп хабарлайды Orda.kz.

Қылмыстық топ Қазақстан, Еуропа Одағы мен ТМД елдерінің азаматтарына хабарласып, өзін заңгер немесе мемлекеттік орган қызметкері ретінде таныстырған. Олар жалған инвестициялық платформаларда жоғалтқан ақшаны қайтарып береміз деген сылтаумен азаматтарды «комиссия», «сот шығыны» деген сияқты төлемдер жасауға немесе жаңа «аударым» үшін несие алуға итермелеген.

Өздерін сенімді етіп көрсету үшін олар жалған құжаттар жолдап, deepfake арқылы бет-әлпетін жасырып, видеоқоңыраулар жүргізген.

Алдын ала мәлімет бойынша, олардың әрекетінен 4500-ден астам адам зардап шеккен, олардың арасында Қазақстан азаматтары да бар. Келтірілген жалпы шығын көлемі 4 миллион доллардан асқан.

Ұйымның нақты құрылымы болған: инвесторлар мен үйлестірушілер, операторларды оқытқан техникалық жетекшілер және тікелей жәбірленушілермен жұмыс істеген орындаушыларды қоса алғанда Call-орталықта шамамен 30 адам жұмыс істеген. Түскен табыс элиталық жылжымайтын мүлік, жер телімдері мен қымбат автокөліктерді сатып алуға жұмсалған.

Тәртіп пен ынталандыру жүйесі де іске қосылып,  операторлар әрбір заңсыз алынған қаражаттан пайыз алып отырған.

11 мекенжайға жүргізілген тінту барысында:

41 компьютер,
24 ұялы телефон,
ондаған sim-карта тәркіленді.

Тәркіленген құрылғылардан қазақстандық байланыс операторларының абоненттік деректер базасы табылған.

15 Украина азаматы ұсталды, олардың тоғызы уақытша ұстау изоляторына қамалды. Тергеу жалғасып,  жаңа эпизодтар мен ықтимал сыбайластар тексеріліп жатыр.

Биылғы жылдың маусым айында ҚР полицейлері қазақстандықтар басқарған трансұлттық қылмыстық топты анықтаған болатын. 

Қаңтар айында Жетісуда шетел және Қазақстан азаматтарынан құралған ұйымдасқан қылмыстық топ ұсталды.

 Сонымен қатар, Қазақстанда бес ай ішінде 95 нарколаборатория қызметі тоқтатылды.