Қазақстанда бес айда 95 есірткі зертханасының қызметі тоқтатылды

Қазақстанда бес ай ішінде 95 нарколабораторияның қызметі тоқтатылды, , деп хабарлайды Orda.kz Ішкі істер министрлігінің ресми интернет-ресурсына сілтеп.

«95 есірткі зертханасының қызметі тоқтатылып, 18 қылмыстық топ, оның ішінде бір трансұлттық ұйымдасқан қылмыстық топ жойылды» деп жазылған хабарламада. 

2025 жылдың бес айында есірткі қылмыстарына қарсы іс-қимыл бөлімдерінің үйлестірілген жұмысының нәтижесінде заңсыз айналымнан 4 тоннадан астам есірткі құралдары және 15 тоннадан астам прекурсорлар тәркіленгені айтылған. Бұл арқылы олардың қара нарыққа түсуіне және халық арасында таралуына жол берілмеді.

Мәліметке сәйкес, 14 мыңнан астам есірткі сайты және 15 мыңнан астам банктік карта бұғатталған. Осылайша азаматтар мен ел экономикасына келуі мүмкін 1 миллиард 230 миллион теңгеден астам залалдың алдын алынғаны көрсетілген.

«Соңғы бір айдың өзінде елдің бірнеше өңірін қамтыған бірқатар ауыр есірткі қылмыстары анықталды: Жамбыл облысында 21 келіден астам гашиш тәркіленді, Алматыда 24 келі марихуана өндірілген нарколаборатория жойылды, Маңғыстау облысында 2,5 келі апиын тәркіленді, ал Алматы облысында 190 келі синтетикалық а-PVP есірткісі мен 8 тонна химиялық прекурсор табылды» деп жазылған ақпаратта. 

Мәлімет бойынша, барлық күдіктілер уақытша ұстау изоляторына қамалды.