Қазақстан мен Өзбекстан Қырғызстанға электр қуатымен көмектесіп, есесіне су алатын болды  

Қазақстан, Қырғызстан және Өзбекстан күзгі-қысқы кезеңде Астана мен Ташкент Қырғызстанға электр энергиясын беруге келісті, ал Бішкек бұның есесіне жинақталған суды көрші елдердің ауыл шаруашылығы алқаптарын суару үшін жібереді, деп хабарлайды Orda.kz.       

Алматыда 2025 жылғы 22 қарашада Қазақстан, Қырғызстан және Өзбекстанның су-энергетикалық ведомство басшыларының отырысы өтті.

«Тараптар су-энергетикалық ынтымақтастықтың алдағы алғышарттары туралы келісті. Тоқтағұл су қоймасындағы күрделі жағдайды ескере отырып, кездесуге қатысушылар бір-бірін электр энергиясымен өзара қолдауға және жылыту маусымын табысты өткізу және алдағы вегетациялық кезеңге дайындық үшін бірлескен күш-жігерді үйлестіруге шешім қабылдады» деп жазылған еліміздің Энергетика министрлігінің хабарламасында.

Қазақстан мен Өзбекстан Қырғызстанға күзгі-қысқы кезеңде электр энергиясын жеткізуге дайын екенін растады. Бұл қырғыз тарапына қыста электр энергиясын өндіру көлемін азайтуға және Тоқтоғұл су қоймасына су жинауға мүмкіндік береді. Жинақталған көлем оңтүстік өңірлердің ауыл шаруашылығы алқаптарын тұрақты суаруды қамтамасыз ету үшін вегетация кезеңінде Қазақстан мен Өзбекстанға жіберілетін болады.

Бұдан басқа, өңірде тұтынуды азайту және энергия қуатын үнемдеу бойынша бірлескен шаралар қабылдау туралы уағдаластыққа қол жеткізілді.

«Келіссөздерге қатысушылар бірлескен жұмыс тату көршілік рухында жүргізіліп жатқанын және бүкіл Орталық Азиядағы энергетикалық қауіпсіздік пен тұрақтылықты нығайтуға бағытталғанын атап өтті. Өзбек тарапы энергия жүйесінің транзиті, жеткізілімі және теңгерімі үшін техникалық шарттарды қамтамасыз етуге дайын екенін растады. Отырыс қорытындысы бойынша 2026 жылғы вегетациялық кезеңге арналған электр энергиясы мен судың жинақталу көлемін заңды түрде бекітетін үш жақты хаттамаға қол қойылды» деп жазылған хабарламада. 

 
Мамыр айында су ресурстары және ирригация министрлігі су шаруашылығы саласы қызметкерлерін әлеуметтік қолдау бойынша бірқатар шара әзірледі. Ведомство «Табиғи монополиялар туралы» заңға су саласы қызметкерлерінің жалақысын электр энергетикасы және жылу энергетикасы саласындағы мамандар деңгейіне дейін арттыруды көздейтін түзетулер енгізуді ұсынды.

Орталық Азиядағы су тапшылығы 2050 жылға қарай 37%-ға жетуі мүмкін.  Орталық және Батыс Азия және оның көршілес елдері аймақтағы су тапшылығына, азық-түлік тапшылығына және тіпті қақтығыстарға әкелуі мүмкін климаттық өзгерістердің барған сайын ауыр зардаптарын жою үшін бірлесіп жұмыс істеуі керек екені туралы Азия даму банкі (АДБ)  мамыр айының басында хабарлаған болатын.