Қазақстан мен Қытай арасындағы автотасымалдауға шектеусіз рұқсат беріледі

Қазақстан мен Қытай автотасымалдауға рұқсат берудің лимитсіз жүйесіне көшіп жатыр, деп хабарлайды көлік министрлігінің баспасөз қызметіне сілтеп Orda.kz.       

«Қазақстан мен ҚХР автотасымалдауға рұқсат берудің лимитсіз жүйесіне көшуге келісті» деп жазылған таратылған хабарламада.

5-6 қарашада «Қорғас» шекара маңы ынтымақтастығы халықаралық орталығында Қазақстан Республикасы Көлік министрлігі мен Қытай Халық Республикасы Көлік министрлігі өкілдерінің халықаралық автомобиль тасымалы мәселелері бойынша кездесуі өтті.

Қазақстан делегациясының құрамына ҚР ҚМ Мемлекеттік кірістер комитетінің, «Қазақстан Халық банкі» АҚ, «Ақпараттық-есептеу орталығы» АҚ және Тасымалдаушылар қауымдастығының өкілдері кірді.

«Келіссөз қорытындысы бойынша тараптар 6-12 қараша аралығында Қытай  Қазақстанға 15 мың рұқсат бланкісін береді деген уағдаластыққа қол жеткізді. Жеті күндік кезеңнің нәтижелері бойынша қазақстандық тасымалдаушылардың сапарға нақты орташа тәуліктік қажеттілігі айқындалады. Алынған деректер негізінде одан әрі бланкілер күн сайын беріліп отырады. 2026 жылдан бастап сандық шектеу белгілемей, бланкілерді лимитсіз бөлуге көшу жоспарланып отыр. Осылайша, ҚХР-ға электронды кезек жүйесі арқылы кіретін барлық көлік құралдарына Қытайда бұрын тіркелген заң бұзушылықтары болмаған жағдайда автоматты түрде бланкілер беріледі»,  деп нақтылады Көлік министрлігі. 

 2024 жылы қазақстандық тасымалдаушылар 228 мың рұқсат бланкісін пайдаланған, ал жыл басынан бері 230 мыңнан астам қытай бланкісі пайдаланылды.

АҚШ президенті Дональд Трамп АҚШ, Қазақстан және Орталық Азияның басқа да елдері арасында жаңа тамаша қарым-қатынастардың басталғанын мәлімдеп, «маған дейінгі президенттер Орталық Азия елдеріне лайықты көңіл бөлмеді», - деді.