Қазақстан мектептері жаңа оқу жылына 100 пайыз оқулықпен қамтамасыз етілді

Еліміздің мектептері жаңа оқу жылының басына қарай қажетті оқулықтар мен оқу-әдістемелік кешендермен 100 пайыз қамтамасыз етілді, деп хабарлайды Оқу-ағарту министрлігінің баспасөз қызметі.

«Қазақстан Республикасы Оқу-ағарту министрлігінің Білім мазмұнын сараптау жөніндегі республикалық ғылыми-практикалық орталығының деректеріне сәйкес, білім беру ұйымдарына оқулықтар жеткізу жұмыстары 100 пайыз толық орындалды. Оқулықтарға тапсырыс беру мен олардың сатып алынуын қаржыландыру бұрынғыдай жергілікті атқарушы органдар арқылы жүзеге асырылады» деп жазылған хабарламада. 

Жаңа оқу жылы басталғанға дейін мектептер оқулықтармен және оқу-әдістемелік кешендермен толық қамтылды. Оның ішінде 7, 8, 10 және 11-сыныптарға арналған жаңартылған басылымдар мен бастауыш сыныптарға арналған жаңа оқулықтар сатып алынды.

Министрлік өкілдерінің айтуынша, ерекше назар бастауыш сыныптарға арналған оқу материалдарын жаңартуға аударылды. Атап айтқанда, 4-сынып үшін мына пәндер бойынша жаңа оқулықтар шығарылды: «Орыс тілі» (қазақ тілінде оқытатын мектептерге арналған), шет тілдері (ағылшын, неміс, француз), «Еңбекке баулу», «Бейнелеу өнері», «Цифрлық сауаттылық» және «Жаратылыстану» (қазақ және орыс тілдерінде). Сонымен қатар, 3-сыныпқа арналған ұйғыр және өзбек тілдеріндегі оқулықтар да дайындалды.

Арнайы білім беру қажеттіліктері бар балаларды оқулықпен қамтамасыз ету жұмысы да жеке қарастырылды. Көру қабілеті төмен және зағип оқушылар үшін арнайы оқулықтар шығарылды: «Қазақ тілі» (1–3-сыныптар), «Жаратылыстану» (1–4-сыныптар), «Орыс тілі» (2–4-сыныптар), «Дүниетану» (2–3-сыныптар), сондай-ақ «Химия» және «Биология» (7–10-сыныптар, қазақ және орыс тілдерінде).

Сонымен қатар, негізгі және жоғары сыныптарға арналған оқулықтар қайта басып шығарылды. Атап айтқанда, 7-сыныпқа қазақ әдебиеті, қазақ тілі мен әдебиеті (орыс тілінде оқытатын мектептерге арналған), орыс тілі, орыс әдебиеті, сондай-ақ орыс тілі мен әдебиеті (қазақ тілінде оқытатын мектептерге арналған) пәндерінен жаңа басылымдар дайындалды. Сонымен қатар, алгебра, геометрия, ағылшын тілі, физика, биология, химия, Қазақстан тарихы және көркем еңбек пәндерінен оқулықтар жаңартылды. Қосымша түрде «Қазақстан географиясы» (7–8-сыныптар), «Қазақстан тарихы» (8-сынып), «Алғашқы әскери және технологиялық дайындық» (10–11-сыныптар) және «Құқық негіздері» (11-сынып) пәндерінен де оқулықтар қайта басылып шықты.

Еске салсақ, АҚШ билігі шетелдік студенттерге, соның ішінде Қазақстан азаматтарына елдегі оқу мерзімін төрт жылдан асырмауды ұсынбақ. Бұл бастама АҚШ-тың Ішкі қауіпсіздік министрлігі жариялайтын жаңа ұсынысқа сәйкес жүзеге аспақ.