Қазақстан құрамасы жеңіл атлетикадан Ташкентте төрт бірдей алтынды жеңіп алды

Қазақстан құрамасы жеңіл атлетикадан Өзбекстанның Ташкент қаласында өткен Silk Road to Tokyo WA Continental Tour Bronze халықаралық турнирінде сәтті өнер көрсетті. Отандастарымыз төрт алтын медаль жеңіп алды, деп хабарлайды Orda.kz.

Бірінші орынды кедергілер арқылы 400 метр жүгіріп өту бойынша Аделина Земс, найза лақтыру бойынша Артур Гафнер иеленді. Одан бөлек жерлестеріміз әйелдер арасындағы 4×400 метрлік эстафетада Александра Залюбовская, Аделина Земс, Виктория Ан, Ирина Конищева және аралас 4×400 метрлік эстафетада Алмат Төлебаев, Аделина мен Виталий Земс және Александра Залюбовская алтын медальға ие болды.

Күміс жүлдегер атанғандар: Александра Залюбовская (400 метрге жүгіру), Кристина Ермола (100 метрге кедергілер арқылы жүгіру), Алмат Төлебаев (100 метрге жүгіру), Ирина Конищева (жетісайыс).

Қола медаль иегерлері: Виктория Ан (200 метрге жүгіру) және Виталий Земс (100 метрге жүгіру).

Еске сала кетсек, 14-15 тамызда Астанадағы «Qazaqstan» жеңіл атлетика кешенінде Халықаралық әскери спорт кеңесінің (CISM) қолдауымен әскери қызметшілер арасында қазақ күресінен әлем чемпионаты өтті. Қазақстандық балуандар жалпы командалық есепте Өзбекстан мен Ресейден озып, бірінші орынды иеленді.