«Қазақстан барысы – 2025»: Еліміздің ең мықты – балуаны әскери қызметші 

Астанада «Қазақстан барысы - 2025» ұлттық турнирі аяқталды. Ең мықты атаққа ҚР Қорғаныс министрлігінің Армия орталық спорт клубының әскери қызметшісі, «Әскер барысы - 2025» турнирінің жеңімпазы, аға лейтенант Марат Байқамұров ие болды, деп хабарлайды Orda.kz Қорғаныс министрлігіне сілтеме жасай отырып.

 Қасым-Жомарт Тоқаев Марат Байқамұровты жеңісімен құттықтады.

 «Қазақстан барысы – 2025» турниріндегі сенімді жеңісіңізбен құттықтаймын! Сіз спорттағы шеберліктің жоғары деңгейін көрсетіп, жанкүйерлерді қуанттыңыз. Мемлекет қазақ күресін одан әрі дамытуды қолдайды», - деп атап өтті Мемлекет басшысы. 

 Қазақ күресінен «Қазақстан барысы - 2025» республикалық турнирі 14-ші рет өтті. Жарысқа өз өңірлерінде үздік атанған 43 спортшы қатысты. Оған қоса, өткен жылғы «Қазақстан барысы - 2024» чемпионы Ерасыл Қажыбаев пен «Әскер барысы» турнирінің екі балуаны қатысты. Қажыбаев күміс жүлде алды. Қола - Маңғыстау облысынан келген Нұрдәулет Жарлығаповтың еншісіне бұйырды.

Турнирдің жалпы жүлде қоры 27 млн теңге болды. Бірінші орын иегері 15 млн теңге, «Тайтұяқ» алтын жүлдесі мен алтын белбеу, екінші орын - 3,3 млн теңге, үшінші орын - 1,08 млн теңге алды. Сондай-ақ, жекпе-жектегі әрбір жеңісі үшін спортшылар 100 мың теңгеден алды, ал жеңімпаздар мен жүлдегерлердің жаттықтырушылары арнайы ақшалай сыйлықтарға ие болды.

 Еске салсақ, Ғалымжан Қырықбай «Қазақстан Барысы-2023» жеңімпазы атанды. Былтыр 5-ші Дүниежүзілік Көшпенділер ойындарында  Қазақ күресі бойынша жарыстар өтті. 

 Биылғы 14-15 тамызда Астанадағы «Qazaqstan» жеңіл атлетика кешенінде Халықаралық әскери спорт кеңесінің (CISM) қолдауымен әскери қызметшілер арасында қазақ күресінен әлем чемпионаты өтті.