«Қазақ Робин Гуды» қажылыққа бармақ болғандар мен мұқтаждардың 33 млн теңгесін қолды қылды

«Елге көмек» қорының басшысы Ілияс Сариевтің соты аяқталуға таяды. Бүгінгі сот отырысында Ақтоты Дүйсеева мен Сариевтің жәбірленушілерге келтірген шығынының жалпы құны аталды. Күдіктілер 33 миллионнан астам елдің қаражатын қолды қылған, деп хабарлайды Orda.kz.

Алмалы аудандық сотында «Қазақтың Робин Гуды» деген лақап атымен танымал Сариев пен қажылыққа арзан бағамен апарамын деген MM Travel туристік фирмасының директоры Ақтоты Дүйсееваның кезекті сот отырысы өтті. 

Еске сала кетейік, бұған дейінгі сот отырыстарында сотта 16 жәбірленуші мен екі күдікті де сот алдында жауап берген еді. Ал бүгінгі сот отырысында судья Ернар Қасымбеков сотқа келмеген жәбірленушілердің жауаптары мен келтірілген материалдық шығыны туралы мәліметтерді жария етті. 

Жалпы осы екі іс бойынша 26 қылмыстық эпизод анықталып, олар бір іске тоғытылған еді. Сот барысында анықталғандай, Дүйсеева жәбірленушілердің біріне келтірілген шығынды толық өтеп берген. Ал Сәриев екі жәбірленушіге ішінара ақшасын қайтарған. Жалпы қазіргі таңда жәбірленушілерге келтірілген материалдық залал 33 миллионнан асады. 

Сонымен қатар, сотта Сариевтің адвокаты судьядан қорғауындағы азаматтың ұялы телефонын қарап шығуды сұрады. Оған себеп осыған дейінгі сот отырыстарында айтылған Сариевтің жәбірленушілердің мұқтаждығын баяндайтын бейнероликтердің түсірілгенін дәлелдеу. Еске сала кетейік, Сариев науқастар мен үйсіз азаматтардан 1,5 млн теңге алып, артынша бейнероликті әлеуметтік желіге салмаған. Сотта күдікті бұл әрекетін келісім бойынша 2025 жылдың рамазан айынан соң жариялану керек екенін артынша істі болған соң жарияланбай қалғанын айтты. Ал 1,5 млн теңгені мобилограф пен жол шығындарына кеткен соң сұрағанын жеткізді.   

«Менің қорғауымдағы азаматтың телефонында жәбірленушілер мен олардың туыстарының бейнежазбалары сақтаулы тұр. Сариев оларды өзінің парақшасында жариялап, қайырымдылық жинағын ашу үшін түсірген. Соны шын мәнінде түсіргенін көрсету үшін телефонын сотта қарауды сұраймыз», — деді адвокат Кішкенебаева.

30 қазанда өтетін сот отырысында тараптар Сариевтің телефонын зерттеп, сот процесі жарыссөз кезеңіне өтеді.

Айта кетейік, Ілияс Сариев пен Ақтоты Дүйсееваға қылмыстық кодекстің 190-бап, яғни «алаяқтық» бойынша айып тағылып отыр. 

Тергеу нұсқасына сәйкес, Сариев үйі жоқ әрі дертіне шипа іздеген науқастарды емдетіп оларға баспана алып беру үшін елден жылу жинауға көмектесемін деп, олардан әртүрлі қаражат жинап, артынша уәдесінде тұрмай бейнежазбаларды әлеуметтік желіге жарияламаған. Нәтижесінде көмекке үміттенген отбасылар ақша да, қолдау да ала алмаған. Бұл эпизод бойынша 6 адам жәбірленуші деп танылды.

Ал екінші сотталушы адамдарға қажылық пен умраға жолдаманы арзан бағада сатып, артынша ол да міндетін орындамай істі болып отыр. Тергеу мәліметінше, бұл істе 20 адам зардап шеккен.

Сариев сотта кінәсін ішінара, 26 эпизодтың алтауын ғана мойындады. Екінші айыпталушы — Ақтоты Дүйсеева да кінәсін ішінара мойындаған, ол тек «MM Travel» компаниясына қатысты эпизодтарды мойындады.

Өткен сот отырысында Ақтоты Дүйсеева да өз түсініктемесін беріп, «MM Travel» турфирмасын Сариевпен бірге 2023 жылдың қаңтарында ашқанын айтты. 2024 жылы компания шоттарынан ірі қаражат алынғаннан кейін қаржылық қиындықтар басталған. Сотта Дүйсеева Сариев компания қаражатын құмар ойындарға жұмсағанын мәлімдеді.