Қазақ даласындағы ашаршылық жайлы арт-фильм Париждегі басты алаңда көрсетіледі

Заманауи өнер мен поэзияны ұштастырған «Täuelxsız» арт-жобасының тұңғыш арт-фильмі Speak Volumes жобасы аясында Парижде көрсетіледі, хабарлайды Orda.kz.

Франция астанасындағы көрсетілім 13 қыркүйекке жоспарланған. «Аштық жайлаған дала» атты қысқа метражды фильм Франциядағы заманауи өнерді қолдайтын халықаралық «rojetbetula» жобасының іріктеуінен өткен.

«Біздің алғашқы видео-арт Франция астанасы Парижде, Speak Volumes жобасы аясында көрсетіледі! Бұл біз үшін үлкен қуаныш әрі үлкен жауапкершілік», – дейді «Täuelxsız» арт-жобасының ұжымы.

Айта кетейік, фильмнің режиссері Лаура Мұхиева, идея авторы әрі продюсері Руслан Жұбаныш. Басты рөлдерді театр және кино актері Бағашқан Тоқтамұрат, Нұрай Сисенбай, Дамир Сейсенбек, Ақмарал Жарбосын сомдайды.

Арт-фильмнің тұсауы биыл – 31 мамыр күні, Саяси қуғын-сүргін құрбандарын еске алу күні қарсаңында кесілген.

Еске сала кетсек, осы жобаның бас продюсері әрі идея авторы Руслан Жұбаныш Orda.kz тілшісіне сұхбат берген болатын.