Қаза тапқандардың отбасыларына көмек көрсетіледі, қажет болса зардап шеккендер Астанаға жеткізіледі — Бозымбаев

Вице-премьер Қанат Бозымбаев Түркістан облысы Жетісай ауданы Алғабас ауылындағы жеке үйдегі өрттің себептеріне байланысты тергеу жүргізуге қатысты үкіметтік комиссия мүшелеріне тапсырма берді, деп хабарлайды Orda.kz. 

Комиссия мүшелерінің қатарында Төтенше жағдайлар министрі Шыңғыс Арынов, Еңбек және халықты әлеуметтік қорғау бірінші вице-министрі Асқарбек Ертаев, Денсаулық сақтау бірінші вице-министрі Тимур Сұлтанғазиев, Ішкі істер министрінің орынбасары Санжар Әділов, Энергетика вице-министрі Қайырхан Тұтқышбаев, Білім вице-министрі Асылбек Ахметжанов, Түркістан облысының әкімі Нұралхан Көшеров бар.

Қаза тапқандардың отбасыларына барлық қажетті көмек көрсетіледі. Ауруханаға жатқызылған үш адам жансақтау бөлімінде жатыр. Құтқарушылар келген кезде 1986 жылы туған зардап шеккендердің бірі үйден өздігімен шыққан. Оның жағдайы ауыр, денесінің 12% күйіп қалған. 

Өрттің себебі анықталып жатыр. ҚР ҚК 292-бабының 3-бөлігі бойынша сотқа дейінгі тергеу басталды. Өрт орнында өртке қарсы қызмет комитеті мен анықтау басқармасы басшылары жұмыс істеп жатыр. 

Ішкі істер министрлігіне адамдардың қаза болу фактісі бойынша сотқа дейінгі тергеу барысын бақылауға алуды, Төтенше жағдайлар министрлігіне өңірлердің әкімдіктерімен бірлесіп тұрғын үйлер, жатақханаларға рейд жүргізуді тапсырды.

Естеріңізге сала кетейік, қайғылы оқиға бүгін, 18 қарашада болды. Түркістан облысы Жетісай ауданы Алғабас ауылында екі қабатты үй өртеніп, 12 адам қаза тапты.