«Қарым-қатынас өзара келісіммен болды»: Зорлау айыбы тағылған шенеунікке қатысты тың дерек

Батыс Қазақстан облысында зорлау күдігімен тергелген 57 жастағы шенеунікке қатысты істе жаңа ақпарат пайда болды. Бұған дейін жасөспірім қыздың әкесі ер адам кәмелетке толмаған қызын алдап үйіне шақырып, зорлағанын мәлімдеген. Полиция Қылмыстық кодекстің 120-бабы 3-бөлігі («Зорлау») бойынша қылмыстық іс қозғаған еді, деп хабарлайды Orda.kz.

Алайда қазір қыздың өзі мен анасы күдіктіге қатысты шағымдары жоқ екенін айтқан. Полиция өкілдерінің хабарлауынша, хат алмасулар мен өзге материалдарды тексеру барысында зорлық белгілері анықталмаған. Қыз бен анасы «қарым-қатынас өзара келісіммен болды» деген түсініктеме берген.

Күдікті Шыңғырлау ауданы әкімдігінің бір бөлімінде жұмыс істеген. Арыз түскеннен кейін ол қызметінен босатылған.

Ал қыздың әкесі бастапқы мәлімдемесінен бас тартпағанын айтып, мемлекеттік қызметкердің жауапқа тартылуын талап етіп отыр.

«Мен арызымнан бас тартқан жоқпын. Қызымның бетіне қалай қараймын? Менің тағы төрт жастағы қызым бар. Ертең дәл осындай жағдай қайталанса, ал кінәлі адам жазасыз қалса, не болады?» — деді ол жергілікті басылымға берген сұхбатында.

Оқи отырыңыздар:

• Тоқаев референдумда барлық азаматқа тең жағдай жасауды тапсырды 
• Қазақстанда мектеп оқушыларына 11 күн демалыс беріледі