Қарағандыда жүргізуші әйелді қағып, оқиға орнынан қашып кеткен

Қарағанды көшелерінің бірінде жүргізуші баласы бар әйелді қағып, оқиға орнынан кеткен, деп хабарлайды Orda.kz.

Баласы анасына қарап, жылап тұрған.

Оқиға балабақшадан баласын алып қайтып келе жатқан 25 жастағы әйелмен болды. Ол 4 жасар ұлымен бірге адамдар өтетін жолақтан өтіп бара жатқан. Абырой болғанда, бала зардап шеккен жоқ. Ал әйелді жедел жәрдем алып кетті, кейін оның аяғы сынғаны және денсаулығы орташа жағдайда екені анықталды.

Қарағанды облысы полиция департаментінің баспасөз қызметі хабарлауынша, оқиға 6 қараша күні кешкі сағат 18:00 шамасында болған.

«Восток-1 көшесінде белгісіз автокөлік жүргізушісі жаяу жүргіншіні қағып, оқиға орнынан қашып кеткен. Жол-көлік оқиғасы салдарынан 25 жастағы әйел 4 жасар ұлымен бірге медициналық мекемеге жеткізілді. Дерек полицияға тіркелді. Қазір күдікті қамауға алынды, көлік айып тұрағына шығарылды»,  деп хабарлады полиция департаменті.

Еске сала кетейік, Астанада Үкімет үйінің алдында әскерде қаза тапқан сарбаздардың аналары митиңге шықты.