Астанада әскерде қаза тапқан сарбаздардың аналары митиңге шықты

Астанада Үкімет үйінің алдында әскерде қаза тапқан сарбаздардың аналары митиңге шықты, деп хабарлайды Orda.kz.

Наразы аналар Қорғаныс министрлігінен әскер жүйесін реформалауды және балаларының өлімі бойынша әділ тергеу жүргізуді талап етті.

«Сарбаздардың өлімі тоқтасын! Әділ тергеу болсын! Әділ сот болсын!», — деп айқайлады әйелдердің бірі.

 «Дәлелдерді жояды, кінәлілер жазадан құтылады, ал біздің балаларымыз қырылады! Неге оларды жазаламайды? Ең ауыр жаза дегенде салғырттық танытқан әскериді жұмыстан босатып қана қояды. Бұл — заң бұзу!», — деді аналар.

Оқиға орнына полицейлер бірнеше рет келіп, әйелдерді тәртіп сақтауға шақырған. Әзірге тәртіп сақшылары аналарды тарқатпай, тек бақылап тұр.