«Қара түтінге тұншықтық»: Алматыдағы тұрғын үй кешенінен өрт шықты

23 тамыз күні кешке Алматының Алмалы ауданындағы Lamiya тұрғын үй кешенінде көпқабатты үйлердің біріндегі кабель шахтасынан өрт шыққан, деп хабарлайды Orda.kz.       

Threads әлеуметтік желісінде тұрғындардың бірі осы тұрғын үй кешенінде тұратын қызының кешкі уақытта оған телефон шалғанын айтып, оқиға туралы жазды.

«Сағат 23:00-де қызым қоңырау шалып, «Анашым, мен сені жақсы көретінімді айтқым келді» деді... Мен ақша керек шығар деп ойладым. Сөйтсем, сол уақытта ол құрбысымен бірге пәтердің ішінде қара түтінге тұншығып отырған екен. Дәл қазір Lamiya тұрғын үй кешені өртеніп жатыр. Қызым: «Анашым, сөйлей алмаймын, бәрі түтінге толып кетті» деді де, телефонды қойып қойды. Кейін қоңырауларыма жауап бермеді» деп жазылған. 

Оның айтуынша, кейін қызы өрт сөндірушілерге хабарласып, пәтердің нөмірін айтқан.

«Қызым мен құрбысы жарық толық өшіп қалған қараңғыда үй жануарларын қолдарына ұстап алып, киім ілетін бөлмеге қамалып, дымқыл сүлгі арқылы тыныс алған. Құрбысы да хабарламаларға жауап бермеді. Мен оның әріптестерінің байланыс нөмірлерін іздеп жатқанда, қызым абдырап қайта қоңырау шалып, өрт сөндірушілердің оларды тауып, құтқарып қалғанын айтты» деп жазды тұрғын. 

Төтенше жағдайлар министрлігінің мәліметінше, Әди Шәріпов көшесіндегі өртке шақыртудың жоғары деңгейі берілген.

Құтқарушылар тұрғындарды эвакуациялады. Сонымен қатар жылу түсіргіш құрылғылардың көмегімен өрттің ошағын іздеді.

00:22-де Төтенше жағдайлар министрлігі өрттің толық сөндірілгенін хабарлады.

Оқи отырыңыз:

• Exit poll нәтижесі жарияланды: Құрылтайға қанша партия өтті?
• Павлодарда ломбард қызметкері 16 млн болатын жұрттың алтын бұйымдарын казиноға тігіп жіберген