Қаңтар оқиғасы бойынша 20 жылға сотталған Дикий Арманды үкім шыққан соң қай жаққа алып кетті?

Адвокат Елена Жигалёноктың айтуынша, оның қорғауындағы Арман Жұмагелдиев пен Арман Өсеновті, сондай-ақ қалған сотталғандарды үкім жарияланғаннан кейін бірден Қазақстанның әртүрлі өңірлеріндегі қылмыстық атқару жүйесі мекемелеріне алып кеткен, деп хабарлайды Orda.kz.

«2025 жылғы 27 қаңтарда Арман Жұмагелдиев, Қайрат Құдайберген, Бердақ Бекетов және басқаларға қатысты үкім жарияланғаннан кейін, қорғауымдағы 37 азаматты Қазақстанның әртүрлі өңірлеріндегі ҚАЖ мекемелеріне жөнелтті. Бұл олардың қорғау құқығын, әділ сот талқылауына деген құқығын шектеп, азаматтардың конституциялық құқықтарын өрескел бұзу» деп жазды Елена Жигалёнок өзінің әлеуметтік желідегі парақшасында.

Сонымен қатар ол сотталғандарды түстен кейін бірден алып кеткенін айтты. Осыған байланысты Елена Жигалёнок еліміздегі адам құқықтары жөніндегі уәкіл Артур Ластаевқа шағым түсірді.  

«Дүйсенбі күні ғана үкім оқылды. Сол күні-ақ Алматыдағы тергеу изоляторынан туыстарымыз жоғалып кетті. Біз 44 жігіттің жартысын таба алмай отырмыз. Олар қайда?» деп жазып жатыр сотталғандардың туыстары әлеуметтік желілерде.

Жағдайға қатысты түсініктеме алу үшін біз ҚАЖ комитетіне сұраныс жолдадық. Жауап алған бойда жариялаймыз.

Дикий Арман, Қайрат Құдайберген және басқалары қандай жаза алғанын әрі Қаңтар кезінде Арман Жұмагелдиев қалай әрекет еткені жайлы мына материалдан оқи аласыз.