Қырғызстанда Қамшыбек Тәшиевке екі бап бойынша айып тағылды

Қырғызстан Ұлттық қауіпсіздік мемлекеттік комитетінің бұрынғы төрағасы Қамшыбек Тәшиевке Қырғызстан Қылмыстық кодексінің екі бабы бойынша айып тағылды, деп хабарлайды Orda.kz 24KG-ға сілтеме жасап. 

Бұл туралы адвокат Икрамидин Айтқұлов мәлімдеген. Оның айтуынша, Қамшыбек Тәшиевке «билікті күшпен басып алу немесе ұстап тұру, сондай-ақ конституциялық құрылысты күшпен өзгертуге бағытталған әрекеттер» және «қызметтік өкілеттігін асыра пайдалану» баптары бойынша айып тағылған.

Экс-басшыға бұлтартпау шарасы ретінде елден шықпау туралы қолхат берілген. Адвокаттың айтуынша, ол өз кінәсін мойындамаған.

Сонымен қатар, бұрынғы бас прокурор Құрманқұл  Зулушев пен Жогорку Кеңештің экс-спикері Нұрланбек Тұрғынбек уулу бойынша жағдай әзірге нақтыланбады. Олар да осы іс аясында күдікке ілінген еді.

Еске сала кетейік, биыл ақпан айында Қамшыбек Тәшиев Қырғызстан ҰҚК төрағасы қызметінен босатылған болатын. Оның өзі бұл шешімді күтпегенін айтқан. Ал ел президенті Қамшыбек Тәшиевтің мемлекеттік қызметке енді ешқашан оралмайтынын мәлімдеді.

Жақында Жогорку Кеңеш депутаты Эльвира Сурабалдиева сұхбатында Қамшыбек Тәшиевтің қызметтен мемлекеттік төңкеріс жасау әрекетін ұйымдастырғаны үшін босатылғанын айтқан.

Ал Садыр Жапаров Тәшиевпен дос болып қалатынын мәлімдеген еді.

Оқи отырыңыз:

• Парижге жаяу барған 76 жастағы қария «Құрметті спорт қызметкері» атағын алды
• Алматыда 81 жастағы зейнеткерді ұрлаған күдіктілер ұсталды
• Путин Жеңіс күні қарсаңында Украинамен уақытша бітімге келуі мүмкін