Қамауға алынған Дина Таңсәрі босап шықты

Черногорияның Жоғарғы соты «НеМолчиKZ» қорының негізін қалаған Дина Таңсәріні Қазақстанға экстрадициялаудан бас тартты, деп хабарлайды Orda.kz.

Бүгін, 15 сәуір күні Черногория астанасы Подгорица қаласында экстрадиция мәселесі бойынша сот отырысы өтті. Сот Қазақстан уақытымен шамамен сағат 13:00-де басталды. Сот отырысы жабық өтті. Бұл туралы «НеМолчиKZ» қорының өкілі хабарлады.

«Отырыс жабық түрде өтіп жатыр. Журналистер ғимараттың алдында тұр. Азаматтық альянс өкілдері (Динаға саяси баспана беру мәселесімен айналысқандар) сот залында», — деп мәлімдеді ол.

Еске салайық, кеше, 14 сәуір күні, Черногорияда «НеМолчиKZ» қорының негізін қалаған Дина Таңсәрі ұсталған еді. Ұсталмай тұрып, ол қысқа бейнежазба түсіріп үлгерген болатын.